Nonsens: uduzmayan komandanı hər oyunda 253 azarkeş izləyir!
"Qəbələ" 1-ci liqanın evdə keçirilən 16-cı tur matçında "Karvan"ı məğlub etməklə liderliyini bir qədər də möhkəmləndirdi.
"Football-plus.az" xəbər verir ki, "qırmızı-qaralar" hərəyə 30 xalla, uyğun olaraq, 2-ci və 3-cü pillədə qərarlaşan "İmişli" və "Karvan"dan 12 xal öndədi. Böyük ehtimalla, hadisələrin axarı "Qəbələ"nin erkən çempion olmasıyla nəticələnəcək.
Bəs, azarkeşlər mövsüm ərzində məğlubiyyət yaşamayan sevimli komandalarının uğurunu necə qiymətləndirir?
"Football-plus.az"ın sualını "Red Black Army"nin rəhbəri Cavad Şərifli cavabladı:
"Qəbələ"nin uğurlu çıxışı hər azarkeşi sevindirir, qürurlandırır. Klubun şəraiti heç bir premyer-liqa iştirakçısından geri qalmır. Büdcənin az olmasına baxmayaraq, komanda üçün hər şey ideal səviyyədə təşkil edilib. Şükür Allaha, bu gün əziyyətin bəhrəsi görülür. Bəli, rəqiblərdən xeyli öndəyik. Amma arxayınlaşmaq olmaz. Daha baxımlı oyunlar sərgiləyib xal ehtiyatımızı artırmalıyıq. Premyer-liqaya qayıdacağımıza inanırıq və buna doğru əmin addımlarla irəliləyirik".
Maraqlıdı ki, komandanın cari mövsümdə keçirdiyi 9 ev matçını cəmi 2280 tamaşaçı stadiondan izləyib. Bu, hər matçı orta hesabla 253 nəfərin izləməsi deməkdi.
Görəsən, qəbələlilər məğlubedilməz lideri niyə daha kütləvi şəkildə dəstəkləmir?
Cavad bəyin cavabı:
"Həmişə dediyim kimi, ölkəmizdə bir neçə klub istisna olmaqla bütün komandalar azarkeş qıtlığıyla üz-üzədi. Düşünürəm ki, zamanla "Qəbələ"nin də tərəfdarlarının sayı artacaq və stadionumuzda izdihamlı oyunlara şahidlik edəcəyik".
KƏNAN BAHADIR
Digər xəbərlər
