"Düzdü, "Qəbələ" premyer-liqadan 1-ci liqaya düşəndən sonra azarkeşlərinin sayı azalıb. Bunu başa düşmək olar. Tərəfdarlar komandanı elitada görməyə öyrəşib. Bəlkə klubdan küsüblər və ya boykot ediblər. Təbii ki, söhbət sıravi azarkeşlərdən gedir.

Səbəblərin sayını artırmaq olar. Bəzən hava şəraiti və oyunun vaxtı da imkan vermir. Bəlkə də rəqiblər azarkeşlərin marağını cəlb etmir. O başqa məsələ ki, premyer-liqa komandalarının oyunlarını da az adam stadiondan izləyir. Tribunalarda əsasən rəmzi fanklubları və futbolçuların qohum-əqrəbasını görürük. Ümumiyyətlə, azarkeş problemi təkcə "Qəbələ"yə aid deyil. Bu, Azərbaycan futbolunun problemidi. "Qarabağ" nəhəng "Ayaks"la oynayanda "Tofiq Bəhramov" dolur. Görək "Şamaxı" ilə matça nə qədər azarkeş gələcək?

"Qəbələ"nin nəticələrinə gəlincə, çempionatın əvvəlidi. Qarşıda hələ çox tur var. Düzdü, "Karvan" çox yaxşı komandadı və bunu nəticələriylə sübut edir. Lakin "Qəbələ" indi qərarlaşdığı pilləyə layiq deyil. Zaman kimin nəyə qadir olduğunu göstərəcək. İnanırıq ki, komandamız premyer-liqaya qayıdacaq. Amma hamı bir yumruq kimi birləşməsə, işimiz çətin ola bilər. Premyer-liqada "Turan Tovuz"un azarkeşləri çox möhtəşəmdi. 1-ci liqada isə "Karvan" və "İmişli"nin ev oyunlarına xeyli tərəfdar gəlir. Qalan komandalarda vəziyyət yaxşı deyil. Bunun səbəbləri araşdırılmalı və problemlər həll edilməlidi. Qısası, nə olur-olsun, "Qəbələ" yaradılan şəraitdən maksimum istifadə edib premyer-liqaya qayıtmalıdı. Buna həm heyətin keyfiyyəti, həm də baş məşqçinin təcrübəsi imkan verir. Ümumiyyətlə, "Qəbələ" ilə 1-ci liqadakı rəqibləri arasında yerdən göyə qədər fərq var".