Türkiyə çempionatından daha bir gözlənilən istefa xəbəri gəlib.

''Football-plus.az'' xəbər verir ki, zəif mövsüm keçirən və elitanı tərk etmək təhlükəsi ilə üzləşən ''Sivasspor'' Ömər Ərdoğan ilə yollarını ayırıb.

Daha öncə ''Fatih Karagümrük'', ''Hatayspor'', ''Ankaragücü'' və ''Alanyaspor''u çalışdıran Ərdoğan bu vəzifəyə Bülənt Uyğunun istefasından sonra - dekabrın 19-da gətirilmişdi. Göründüyü kimi 47 yaşlı mütəxəssisin Sivas macərası cəmi 77 gün çəkib.

''Yiğidolar'' bu müddətdə 9-u superliqa, 3-ü ölkə kubokunda olmaqla keçirdikləri 12 rəsmi qarşılaşmanın cəmi 1-də qalib gəliblər (3 heç-heçə, 8 məğlubiyyət). Ərdoğan komandanı 13-cü pillədə qəbul etmişdisə, hazırda Sivas təmsilçisi 15-ci pillədədi və düşmə zonası ilə eyni - 24 xala malikdi. ''Sivasspor'' ölkə kubokunda da öz qrupunu sonuncu pillədə tamamlayaraq mübarizəni dayandırıb.

Düzdü, komanda qrupda 3 oyundan 1-də qalib gəlmişdi. Amma həmin matçda cəzalı futbolçu oynatdığına görə sivaslılara texniki məğlubiyyət verildi. Böyük ehtimalla komandanı quyunun dibindən çıxarmaq vəzifəsi Rza Çalımbaya tapşırılacaq. Əslən Sivasdan olan təcrübəli mütəxəssisi məşqçi kimi bu komandanın əfsanəsi saymaq olar.

O iki fərqli dönəmdə ümumilikdə 7 il sivaslıları çalışdırıb. İkinci dönəmində (2019-23) komandanı ardıcıl 3 mövsüm avrokuboklara daşıyıb. Türkiyə çempionatı tarixində ən çox (650) oyuna çıxan məşqçi statusunda olan 62 yaşlı Çalımbay 24 illik məşqçilik karyerasında yeganə titulunu 2022-də ''Sivasspor'' ilə ölkə kubokunu qazanmaqla əldə edib.

ƏLİ