İspaniya mətbuatı Ardanın performansı haqda nə yazdı?
Məlum olduğu kimi İspaniya kubokunun yarımfinalının ilk oyununda ''Real'' səfərdə ''Real Sosyedad''ı minimal hesabla yenərək final yolunda böyük üstünlük əldə etdi.
''Football-plus.az'' xəbər verir ki, Karlo Ançelotti bu dəfə nəhayət, Arda Gülərə də şans verdi. Son 5 rəsmi oyunun hamısını ehtiyatda keçirən 20 yaşlı türkiyəli ulduz bu matçda start heyətində meydana çıxdı və sağ vinger mövqeyində 83 dəqiqə oynadı. Amma İspaniya mətbuatı Ardanın performansından razı qalmadı.
Məsələn, ''Marka'' nəşrində bunlar qeyd olunub:
''Türkiyəli futbolçu özünü sübut etməyə çalışırdı. İndi onun üçün qazandığı hər dəqiqə qızıla bərabərdi. Amma bu oyunda ''Real''ın hücum xəttində ən zəif təsir bağışlayan futbolçu oldu. Çox da oyunun içinə girə bilmədi. Hərçənd daim müdafiəyə yardım etməsi ilə diqqət çəkdi. Ançelotti çox güman, onun oyuna və mövqeyinə ciddi yanaşmasından məmnun qalacaq. Amma sözsüz ki, Ardadan hər kəs bundan daha artığını gözləyir. Çünki bu matçda sehrini nümayiş etdirə bilmədi. Arda üçün çox çalışdığı, amma çox şey göstərə bilmədiyi bir oyun oldu''.
''As'' nəşrində isə bunlar qeyd olundu:
''Bellingemin istəkli oyunu, yeni kapitan Vinisiusun daha öncə görünməyən fədakarlıq ruhu, Fran Qarsiyanin 90 dəqiqə yorulmadan öz cinahında işləməsi, Endrikin son zərbəsi, Çuameninin mükəmməl oyunu və Luninin sehrli əlləri ''Real''ın güclü yönləri idi. Amma komandanın zəif yönləri də oldu. Məsələn, Arda Gülərin sehri sanki buxarlanmışdı''.
Elə ''Sport'' nəşri də xoş sözlər yazmadı:
''Arda Ançelottiyə özünü sübut etmək üçün qızıla bərabər şans qazandığı gecə də, demək olar, ortalıqda görsənmədi. Mövqelərin arasında oynadı və matçboyu oyunun içinə girmək üçün mübarizə apardı''.
ƏLİ
Digər xəbərlər
