Konfrans Liqasının (KL) pley-offuna yekun vuruldu.

"Football-plus.az" xəbər verir ki, bu mərhələnin cavab oyunlarında sürpriz nəticələr qeydə alındı.

Vahid liqanın yekun cədvəlində ilk 8 yeri tutan “Çelsi”, “Gimaraynş”, “Fiorentina”, “Rapid”, “Yurqorden”, “Luqano”, “Legiya” və “Serkl Brügge” birbaşa 1/8 finala vəsiqə qazanıblar. Reqlamentə əsasən, əsas bu mərhələni 9-24-cü yerlərdə başa vuranlar isə pley-off oyunlarında iştirak etdilər və bu matçların 8 qalibi də 1/8 finala çıxdı.

Liqa mərhələsinin diqqəti daha çox cəlb edən faktı KL-də iştirak edən qitənin 5 aparıcı çempionatından olan 4 komandadan ikisinin ilk “8-liy”ə düşə bilməməsi olmuşdu. Xatırladaq ki, “Çelsi” 6 oyuna maksimum nəticə ilə 1-ci yerə sahib çıxıb. Turnirin son iki mövsümünün finalçısı olan “Fiorentina” yekun cədvəli 3-cü yerdə başa vurub. Hərəyə 10 xal toplayan “Betis” ilə “Haydenhaym” uyğun olaraq 15-16-cı yerləri tutmaqla pley-offda oynamağa məcbur idilər.

“Böyük beşliy”in təmsilçiləri bu mərhələyə uğurla start verməklə əsas mərhələdəki səhvlərindən lazımi nəticələr çıxarmışdılar: hər iki komanda pley-offun ilk səfər oyununda qələbə qazanmışdı. Belçikada “Gent”in qapısına üç dəfə yol tapan “Betis” cavab oyununda minimal hesabla uduzdu. Amma bu nəticə İspaniya klubunun pley-offu adlamasına mane olmadı. Danimarkada “Kopenhagen”ə 2:1 hesabıyla qalib gələn “Haydenhaym” Almaniyada böyük çətinliklərlə qarşılaşdı. Qonaq komanda əsas vaxtı eyni hesabla üstün başa vurmaqla “overtaym”ı labüd etdi. Həlledici hissələrdə də oyun planında üstün görünən “Kopenhagen” 3-cü qolu vuraraq bundesliqa təmsilçisini mübarizədən kənarlaşdırdı. Nəticə ilk baxışdan sürpriz kimi görünür, amma “Haydenhaym”ın avrokubok təcrübəsi(zliyi)nə görə Danimarka klubu ilə müqayisəyə gəlmədiyini də vurğulamalıyıq.

pley-off, cavab oyunları
Betis (İspaniya) - Gent (Belçika) 0:1 (ilk oyun – 3:0)
Braun, 87.
Betis: Vyeytes, Perro, Natan, Lyorente (Bartra, 46), Sabali (Ruibal, 59), Altimira (Kardoso, 59), Flores (Peres, 79), Ezzalzuli, Çimi Avila, Antoni (İsko, 59), Roke.

Haydenhaym (Almaniya) - Kopenhagen (Danimarka) 1:3, əlavə vaxtda (2:1)
Sienza, 73 – Şaxya, 37. Diks, 53-p. Ueskas, 113.
Haydenhaym: Föller, Zirsleben, Mainka, Keller (Piringer, 46), Bek, Vanner (Toyerkauf, 113), Ferenbax (Sienza, 57), Kerber (Honzak, 46), Nihyus (Şeppner, 57), Buş (O.Traore, 74), Zivzivadze.

Olimpiya (Sloveniya) - Borats (Bosniya və Hersoqovina) 0:0 (0:1)

Pafos (Cənubi Kipr) - Omoniya (Cənubi Kipr) 2:1 (1:1)
Bruno Souza, 28. Jonatan Silva, 65 - Yovetiç, 60.

Yagelloniya (Polşa) - TSÇ (Serbiya) 3:1 (3:1)
Hansen, 8. İmas, 70. Radoyeviç, 76-öz qapısına - Lazetiç, 17.

APOEL (Cənubi Kipr) - Selye (Sloveniya) 0:2 (2:2)
Kuçis, 45+4. Svetlin, 51.

Panatinaikos (Yunanıstan) - Vikinqur (İslandiya) 2:0 (1:2)
Mladenoviç, 70. Tete, 90+5-p.

Şemrok Rovers (İrlandiya) - Molde (Norveç) 0:1, p. - 4:5 (1:0)
Eykrem, 10.

Bombardirlər: Qiyu (Çelsi), Pyulyulyu (Yagelloniya) - 6.