Olivye Jiru arzuolunmaz vəziyyə düşüb. Onun evi qarət edilib.

Hadisə bu ayın əvvəlində baş versə də, ABŞ mətbuatı bundan təxminən üç həftə sonra xəbər tutub.

“TMZ Sports”un yaydığı məlumata görə, “Los Anceles”in məşhur hücumçusunun eyniadlı şəhərdəki evindən oğurluq edilib. Hələ ki, kimliyi müəyyən edilməyən cinayətkarlar 38 yaşlı futbolçunun evinə fevralın ilk günlərindən birində soxulublar.

"Football-plus.az" xəbər verir ki, Olivyenin həyat yoldaşı bu haqda polisə ayın 5-də evin pəncərəsinin qırılmasından xəbər tutandan sonra şikayət edib.

Jiru ailəsinə dəyən zərər təxminən 500 min dollar məbləğində qiymətləndirilir. Evdən bir neçə qiymətli əşyanın, o cümlədən 10-dan artıq saatın oğurlandığı bildirilir. Polis cinayət hadisəsi ilə bağlı araşdırmaları davam etdirir.

Qeyd edək ki, Fransa yığması ilə DÇ-2018-in qalibi olan Olivye ABŞ-də 2024-cü ilin yayından oynayır. O, MLS-də 10 oyun keçirib.