Olivye Jiru mövsümün sonunda “Milan”dan ayrılacaq.

Fransalı hücumçunun İtaliyadan Amerikaya yollanmaq şansı çoxdu. Jirunun əsasən ABŞ klublarının hədəfində olduğu məlum idi. “La Gazzetta dello Sport”un bir neçə gün əvvəl yazdığına görə Olivye Nyu York və Los Anceles klublarından birində qərar tuta bilər. Onun konkret hansı kluba yollanacağına aydınlıq gətirilmirdi.

Son xəbərlərə görə, 37 yaşlı Jiru yayda “Los Anceles”də qərar tutmağa yaxındı. Tanınmış jurnalist Fabritsio Romano dünya çempionunun bu klubla müddəti 2025-ci ilin sonuna qədər nəzərdə tutulan müqavilə üzrə şifahi razılığa gəldiyini xəbər verib. Olivye “Milan”da 2021-ci ildən çıxış edir.