Naxçıvanda işlərə start verildi – AFFA, AGİN və bölgə rəhbərliyi iş başında
Naxçıvanı təmsil etsə də, ev oyunlarını Mərdəkanda – “Liv Bona Dea Arena”da keçirən, ev matçlarına orta hesabla 255 tamaşaçı gələn “Araz-Naxçıvan” tez-tez məhz bu məsələlər üzündən gündəmə gəlir.
Klub rəsmiləri bildirir ki, komanda Muxtar Respublikaya qayıdandan sonra problemlər aradan qalxacaq. Hətta icraçı direktor Eldəniz Yusubov daha iddialı danışır: “Naxçıvanda qayıdandan sonra hamı görəcək ki, tərəfdar sevgisi necə olur”.
Bəs, “qırmızı-ağlar” sözün əsl mənasında “doğma divarlar” arasına nə vaxt qayıdacaq? Bununla bağlı hansı addımlar atılır?
“Football-plus.az” bu suallarla yenidən Eldəniz bəyə müraciət etdi. Məlum oldu ki, artıq Naxçıvan şəhər stadionuyla bağlı işlərə start verilib:
“Proseslə bağlı müəyyən yeniliklər var. Hər şey müsbətə doğru irəliləyir. Bildiyimə görə, həm Naxçıvan rəhbərliyi, həm AFFA-nın müvafiq komissiyası, həm də Gənclər və İdman Nazirliyinin nümayəndələri stadionda yoxlama aparıblar və hesabat hazırlayıblar. Hazırda ot örtüyünün dəyişdirilməsi, stadionun lisenziya tələbləri çərçivəsində bərpa olunması, işıqlandırma və VAR sisteminin təmin edilməsiylə bağlı işlər görülür”.
KƏNAN BAHADIR
