Çempionlar Liqasında (ÇL) arxada qalan liqa mərhələsində özünü ən yaxşı tərəfdən göstərən futbolçuların kimliyi üzərində çox da baş sındırmağa dəyməz.

Bu mərhələnin rəmzi komandasına daha çox layiq olan 11 oyunçunun parlaq çıxışını qısaca xatırlayaq.

qapıçı
Emiliano Martines (Aston Villa). Yan Zommer 8 oyunda topu qapısından yalnız bir dəfə çıxarıb. “İnter”in veteran qapıçısı sırf bu fakta görə rəmzi komandada olmalı idi. Onun komandasının müdafiə xəttinin çox güclü olduğu heç kimə sirr deyil. Amma Martines də çox sayda seyvləri ilə əməlli-başlı zəhmət çəkib. 6 top buraxsa da, qapı çərçivəsinə yönələn zərbələrin 87,2 faizini dəf edib. Daim arxa xətt oyunçularına göstəriş və ümid verməsi isə argentinalı dünya çempionunun Yan ilə müqayisədə komandasının uğurlu çıxışı üçün daha çox tər tökdüyünü deməyə əsas verir.

müdafiəçilər
Denzel Dyumfris (İnter). Əşrəf Hakimi əsasən zəif rəqiblərlə oyunlarda komandası üçün dəfələrlə qol vurmaq imkanı yaradıb. Amma PSJ liqa mərhələsinin ən uğurlu iştirakçıları sırasında deyil. Dyumfris isə qapısından yalnız bir top buraxan komandanın oyunçusudu. Onun sağ cinahda mövcudluğu “İnter”in həm müdafiəsini, həm də hücumunu gücləndirir.

İbrahima Konate (Liverpul). “Liverpul”un cinah müdafiəçilərinin tez-tez hücuma atıldığı hamıya bəllidi. Mərkəzdə rəqib hücumlarının qarşısını almaq funksiyası isə Vircil van Diyk ilə Konatenin üzərinə düşür. ÇL-də bu planda fransalı İbrahimanın daha səliqəli oynadığı faktdı.

Qabriel Maqalyans (Arsenal). Braziliyalı müdafiəçi həm arxa xətdə inamlı oynayıb, həm də yeri gələndə komandasının hücumlarını gücləndirib. Qabrielin standart vəziyyətlər zamanı rəqib müdafiəsinə dəfələrlə probemlər yaratması oyundaşları üçün qapıya yol tapmaq fürsəti olub.

Alexandro Qrimaldo (Bayer-04). Bir neçə il əvvəl hazırkı klubuna azad agent kimi gələn ispaniyalı futbolçu Almaniya çempionatı və Avropa Liqasından sonra ÇL-də də özünü universal futbolçu kimi göstərib. Alexandro həm müdafiə, həm də hücum planında “Bayer-04”ə daha çox faydalı olan oyunçulardandı.

yarımmüdafiəçilər
Malik Tillman (PSV). Gənc amerikalı universallığı ilə yadda qalıb. Zədə səbəbindən “Liverpul”a (3:2) qarşı vacib oyunda iştirak etməsə də, xüsusilə “Jirona” (4:0) və “Şaxtyor”la (3:2) matçlardakı məhsuldar çıxışı ilə komandasına çox fayda verib.

Şarl de Ketelare (Atalanta). Şarl artıq ikinci mövsümdü özünü “Atalanta”nın vurduğu qollarda böyük pay sahibi kimi göstərir. “Qol+ötürmə” sistemi üzrə 9 bal toplayan belçikalı ÇL-də komandasının hücum potensialını təşkil edən əsas oyunçudu.

Florian Virts (Bayer-04). O, Erlinq Holann, Harri Keyn və Viktor Dyökereş kimi mərkəz hücumçuları qədər – 6 qol vurub. ÇL təcrübəsi olmayan 21 yaşlı yarımmüdafiəçi üçün çox yaxşı göstəricidi.

hücumçular
Vinisius Junior (Real). 7 qol vurub 1 məhsuldar ötürmə edən braziliyalı Dortmund “Borussiya”sı ilə matçda (5:2) het-trik, “Atalanta”ya qarşı daha bir vacib oyunda (3:2) isə qol və assist ilə “Real”a faydalı olub.

Robert Levandovski (Barselona). Seru Girassi (Borussiya D) 9 qolla əsas mərhələnin şərikli bombardiridi. Lakin polşalı Levandovski hücum xəttində komandasına məhsuldar və kəskin ötürmələr verməklə də faydalı olub.

Rafinya (Barselona). “Barselona”nın daha çox – 28 qol vurmasında braziliyalı vingerin də böyük payı var. Rafinya 8 qol və 4 assist ilə rəmzi komandadan əsla kənarda qala bilməzdi!