Vanda Naranın İkardiyə xəyanət etdiyi sübuta yetirildi!
Mauro İkardinin keçmiş həyat yoldaşı Vanda Nara ilə bağlı yeni şok faktlar ortaya çıxıb. Söhbət onun Keyta Balde ilə gizli eşq yaşamasının və İkardiyə xəyanət etməsinin sübuta yetirilməsindən gedir.
Əslində bu, yeni mövzu deyil. Vanda Nara 2023-ün yanvarında Dubaya istirahətə yollanmış və orda bir gecəni oteldə Keyta Balde ilə keçirmişdi. Seneqallı forvard həmin dönəmdə ''Spartak''ın şərəfini qoruyurdu və komandası ilə birlikdə Dubayda toplanışda idi. Vanda hətta bu futbolçu ilə birlikdə çəkdirdiyi şəkilləri, videoları sonradan İkardiyə də göndərmiş və münasibətləri pozulduğu dönəmdə ona bir növ acıq vermişdi. Artıq Çayna Suares ilə eşq yaşayan və Vanda ilə boşanma prosesi davam edən İkardi də bu şəkilləri, videoları məhkəməyə sübut qismində təqdim etmişdi. Bu hadisənin üstü açıldıqdan sonra Baldenin də ailəsi dağılmış və həyat yoldaşı Simona Quatyeri boşanma ərizəsi vermişdi.
Yeri gəlmişkən, 29 yaşlı Balde bu mövsümə ''Sivasspor''da başlamışdı. Yanvarın 7-də Sivas təmsilçisi gözlənilmədən bu futbolçu ilə qarşılıqlı şəkildə anlaşaraq müqaviləni ləğv etdi. Şayiələrə inansaq, məhz İkardinin məhkəməyə təqdim şəkillərdən sonra ''Sivasspor'' Balde ilə vidalaşmaq qərarına gəldi. Bu arada Keyta Balde qatıldığı bir verilişdə ilk dəfə bu mövzuya toxunaraq Vanda ilə gizli münasibətinin olduğunu etiraf etdi:
''Bəli, Vanda Nara ilə münasibətim olmuşdu. Bütün deyilənlər doğrudu. Həyatımın ən böyük səhvinə yol verdim. Vandanı heç nədə günahlandırmıram. Bütün məsuliyyəti üzərimə götürürəm. Səhv onun yox, mənimdi. İkardi ilə Vanda arasındakı münasibətlərin bu həddə çatması mənim üzümdən baş verməyib. Onları günahlandırmıram. Amma qəlbsiz şəkildə bu məsələni ictimailəşdirirlər. Yol verdiyim bu səhvə görə özümü yaxşı hiss etmirəm. Simona həyatımın sonuna qədər sevəcəyim yeganə qadındı''.
Bu arada İkardinin məhkəməyə təqdim etdiyi şəkillərdən biri mətbuata və sosial şəbəkələrə sızıb. Ən son xəbərlərdə qeyd olunur ki, Keyta Balde Vanda ilə birlikdə olduğu gün təhlükəsizlik kamerası ilə çəkilən görüntülərin icazəsiz şəkildə mətbuata sızdırılması üzündən həm İkardini, həm də Naranı məhkəməyə verib. Bundan başqa Simona Quatyeri də bütün bu hadisələr üzündən şəxsi həyatının gündəmə gətirilməsinə görə Baldedən ayrı şəkildə İkardi ilə Naranı məhkəməyə verib.
ƏLİ
Digər xəbərlər
