Hazırda ABŞ-də çıxış edən Lionel Messini Avropaya bağlayan daha bir xəbər yayılıb. “İnter Mayami”nin hücumçusu Barselonadakı həyatı üçün darıxır.

“Relevo”nun məlumatına görə, 37 yaşlı ulduz futbolçu ABŞ klubu ilə müqaviləsini yeniləməyə tələsmir. Müqavilənin müddəti bu ilin sonuna qədər nəzərdə tutulub. Messi sabiq klubu “Barselona”nı öz evi hesab edir. O, karyerasını başa vurduqdan sonra Barselonada yaşamaq niyyətindədi. Argentinalı futbolçunun ailəsi də yaxın gələcəkdə bu şəhərə qayıtmaq istəyir.

Xatırladaq ki, Messi 2000-ci ildən 2021-ci ilə qədər “Barselona”nın sıralarında olub. Əsas komandada 2004-cü ildə debüt edib. 17 il ərzində göy-qırmızı formada 778 matç keçirib, 672 qol vurub və 303 məhsuldar ötürmə verib.