Türkiyənin iki klubu yeni baş məşqçisinə qovuşub. Öncə qeyd edək ki, “Antalyaspor”da Aleks de Souza dönəmi başa çatıb. Komanda son turda səfərdə “Trabzonspor”dan 5 cavabsız qol buraxaraq ağır məğlubiyyətə düçar olmuşdu.

Rəhbərlik braziliyalı məşqçi ilə görüşərək ondan izahat tələb etdi. Aleks bu heyətlə bundan artığına nail ola bilməyəcəyini vurğulayaraq ən azı 5-6 yeni transfer tələb etdi. Amma “Antalyaspor”un maddi cəhətdən çox çətin dönəmdə olması azmış kimi, komandaya həm də transfer cəzası verilib. Hətta Aleks özü də oktyabrdan bəri maaş almırdı. Klub rəhbərliyi daha sonra kapitanların da fikrini öyrənəndən sonra 47 yaşlı məşqçinin işinə son verildi. Hələ “Fənərbaxça”da oynadığı dönəmdən alicənablığı ilə diqqəti çəkən Aleks bu dəfə də önəmli jest etdi. O, klubdan heç bir təzminat tələb etmədi. Halbuki Aleksin müqavilə müddəti 2026-nın yayına qədər nəzərdə tutulmuşdu.

İllik qazancı 600 min avroya yaxın olan mütəxəssis, sadəcə, yanvara qədər olan pulunu tələb edərək Türkiyədən ayrıldı. “Antalyaspor”un 18 oyuna topladığı 21 xalla 13-cü pillədə qərarlaşdığını bildirək. Rəhbərliyin məşqçi axtarışı uzun çəkməyib. Aleks istefaya göndəriləndən cəmi bir gün sonra Əmrə Belözoğlu ilə ilyarımlıq anlaşma əldə olundu. Daha öncə “Fənərbaxça”, “İstanbul BŞ” və sonuncu dəfə “Ankaragücü”nü çalışdırmış 44 yaşlı Əmrənin məşqçi karyerası hələ ki istənilən səviyyədə alınmır. Hətta ötən mövsüm o, paytaxt təmsilçisini elitada saxlaya bilmədi. Göründüyü kimi, Belözoğlunun əlinə özünü məşqçi kimi sübut edə bilmək üçün daha bir fürsət düşüb.

Digər təyinat isə “Hatayspor”da reallaşıb. Çox zəif mövsüm keçirən Hatay təmsilçisi hələ dekabrın sonlarında Rza Çalımbayla yollarını ayırmışdı. Son iki qarşılaşmada komanda meydana idman direktoru Yılmaz Balın rəhbərliyi altında çıxmışdı. Son 6 rəsmi oyunun 5-də məğlub olan və superliqada sondan əvvəlki pillədə qərarlaşan “Hatayspor”u böhrandan çıxarmaq vəzifəsi Murat Şahinə tapşırılıb. 48 yaşlı mütəxəssislə ilyarımlıq müqavilə imzalanıb. Bu seçim bir qədər qəribə görünür. Çünki Şahinin müstəqil məşqçi kimi təcrübəsi yoxdu.

O indiyə qədər əsasən Sərgən Yalçının köməkçisi kimi çalışıb. 2020/21-də məhz bu vəzifədə “Beşiktaş”ın çempionluğunda rol oynayıb. Şahinin debütü dünən “Qalatasaray”la oyuna təsadüf etdi. Onu da bildirək ki, “Hatayspor”un da “Antalyaspor” kimi transfer cəzası var. Bu klub Renat Dadaşova olan borcu üzündən FİFA tərəfindən cəzalanıb.

Hazırda “Ankaragücü”də çıxış edən yığmamızın üzvü ötən mövsüm “Hatayspor”da icarə əsasında forma geyirdi. Ümumilikdə Türkiyə superliqasında çıxış edən 6 klub üçün hazırda transfer qadağası mövcuddu!