MBA-da müntəzəm mövsüm davam edir.

''Football-plus.az'' xəbər verir ki, Nikola Yokiçin mövsümdə 19-cu ''tripl dabl''ını müəyyənləşdirdiyi qarşılaşmada ''Denver'' ''Filadelfiya''nı 144:109 hesabı ilə darmadağın etdi. MBA-da 22-ci mövsümünü keçirən və saysız-hesabsız rekordların sahibi olan Lebron Ceyms isə yenə adını tarixə yazdırdı.

Ceyms ''Leykers''in ''Vaşinqton''u 111:88 məğlub etdiyi oyunu 21 xal, 10 ribaund, 13 ötürmə göstəriciləri ilə tamamlayaraq mövsümdə 9-cu, karyerasında 121-ci dəfə ''tripl dabl'' etdi. O, bunu 40 yaş 23 günlüyündə bacardı. Ceyms bununla da Karl Melounun ardında MBA tarixində 40 yaşdan sonra ''tripl dabl'' edən cəmi 2-ci basketbolçuya çevrildi! Meloun turnirin tarixində ''tripl dabl'' etmiş ən yaşlı basketbolçudu. O, bunu 2003-cü ilin noyabrın 28-də 40 yaş 127 günlüyündə bacarmışdı.

Bundan başqa Ceyms bu oyunda iki dəfə topu rəqibdən oğurlamağı bacardı. O, MBA-da ümumilikdə bu göstəricisini 2309-a çatdırdı. Bununla da Ceyms topu ən çox rəqibdən alan basketbolçuların siyahısında Skotti Pippeni (2307) keçərək 7-ci pilləyə yüksəldi. Bu siyahıda lider Con Stoktondu (3285).

ƏLİ