Premyer-liqa klubları transfer çalışmalarını davam etdirir, əsasən də legionerlərlə güclənməyə çalışırlar.

Ölkəmizə artıq xeyli yeni legioner qədəm qoyub. Biz ölkəmizə gələn legionerlərdən doqquzunu araşdırdıq – qiymətlərindən tutmuş karyeralarına qədər.

Anton Kraçkovski (400 min avro – transfermarkt.com). Rusiya əsilli futbolçudu. Əsasən mərkəz yarımmüdafiəçisi mövqeyində çıxış edir. 2024-cü ildə Mahaçqala “Dinamo”suna transfer olunub. Ötən il iyulun 21-də Rusiya premyer-liqasında debüt edib. Debütdə - “Ximki” ilə oyunda Antonun səbəbkar olduğu iki penalti rəqib komanda tərəifndən dəqiq yerinə yetirilməyib. Kraçkovski həmin mövsümdə “Dinamo”nun heyətində 18 oyunda iştirak edib, qol vurmayıb. “Dinamo” onu cari mövsümün sonuna qədər “Turan Tovuz”a icarəyə verilib.

Maykl Tuike (250 min). Braziliyalı sol cinah hücumçusu mövqeyində oynayıb. 2023/24 mövsümündə Litvanın “Hegelmann” klubunda çıxış edib. A liqasında 34 oyunda 9 qol və 3 məhsuldar ötürmə ilə yadda qalıb. Litva kubokunda 5, Konfrans Liqasının təsnifat mərhələsində 2 oyunda iştirak edib. “Şamaxı” braziliyalı ilə ilyarımlıq müqavilə imzalayıb.

Rinosuke Ohori (250 min). Mərkəz müdafiəçisi mövqeyində çıxış edir. O, “Sanfreççe Xirosima” akademiyasında futbol təhsilinə başlayıb. 2024-cü ildə Litvanın “Transinvest” klubunda 31 çempionat oyununda meydanda olub, 6 qol, 1 ötürmə ilə yadda qalıb. Bundan başqa, Litva kubokunda 1 oyunda iştirak edib. “Neftçi” 24 yaşlı yaponiyalı futbolçu ilə “1,5+1 il” şərti ilə müqavilə bağlayıb.

Andrey-Kostin Tırkovyanu (150 min). Rumıniyalı əsasən yarımmüdafiəçi mövqeyində çıxış edir. 2024-cü ilin martında azad agent kimi Kanada premyer-liqasının təmsilçisi “Pasifik”ə keçib. Andrey-Kostin 22 oyunda iştirak edib və 2 dəfə fərqlənməyi bacarıb. Bu ilin yanvarınfa “Şamaxı”ya transfer olunub, ilyarımlıq müqavilə imzalayıb.

Marko Nikoliç (150 min). Serbiyalı əsasən mərkəz müdafiəçisi mövqeyində çıxış edir. 2024-cü ildə Qazaxıstanın “Turan”ına transfer olunub. 22 oyunda iştirak edib, qol vurmayıb. “Səbail” 26 yaşlı futbolçu ilə ilyarımlıq müqavilə imzalayıb.

Rati Ardazişvili (125 min). 2024-cü ildə Gürcüstan “Samtredia”sına transfer olunub. Çempionatda 17 oyunda iştirak edib, 1 qol , 2 məhsuldar ötürmə ilə yadda qalıb. 26 yaşlı yarımmüdafiəçi ilə “6ay + 1 illik” müqavilə bağlanıb.

Vladislav Veremeyev (75 min). 2024-cü ilin yanvarında Latviyanın “Yelqava” klubuna transfer olunub. “Yelqava”nın heyətində 28 oyunda iştirak edib, 3 qol vurub. 5 məhsuldar ötürməsi də var. “Şirlər” ukraynakl mərkəz müdafiəçisi ilə ilyarımlıq müqavilə bağlayıb.

İnnosent Nşuti (75 min). Ruanda millisinin hücumçusudu. 2024-cü ilin əvvəlində ABŞ-ın “Knohville” klubuna qoşulub. Nşuti millidə 11 oyun keçirib, dünya çempionatının seçmə oyununda qol vurub. “Knohville”nin uğurları üçün çalışdığı dövrdə baş məşqçi Mark Makkever onun fərqli qollar vurma bacarığını və müdafiəçilər üçün yaratdığı çətinlikləri vurğulamışdı. Amma klubun 12 oyununda iştirak etsə də, rəqib qapısına yol tapmağı bacarmayıb.
Alfons Msanqa Mabula (50 min). 21 yaşlı futbolçu Serbiyanın “Spartak” klubuna məxsus olub, sonuncu dəfə icarə əsasında həmin ölkənin “Novi Sad” klubunda çıxış edib. 19 oyunda iştirak edib, 4 dəfə fərqlənməyi bacarıb. “Şamaxı” tanzaniyalı müdafiəçi ilə ilyarımlıq müqavilə imzalayıb.

ƏSƏD SEYİDOV