“Şalke-04” heyətini yeni futbolçu ilə gücləndirib.

Bundesliqa təmsilçisi “Liverpul”dan müdafiəçi Sepp van den Berqi icarəyə götürüb. Bu haqda sözügedən klublar rəsmi saytı vasitəsilə məlumat yayıb. 20 yaşlı futbolçunun 2022/23 mövsümünün sonuna qədər Almaniyada oynayacağı diqqətə çatdırılıb.

Van den Berq 2019-cu ildən “Liverpul”dadı. Premyer-liqa nəhəngi onu həmin ilin yayında “Zvolle”dən 1,9 milyon avroya transfer etmişdi. Niderlandlı müdafiəçi “qırmızılar”ın əsas komandasında cəmi 4 matça çıxıb. Ötən mövsüm isə “Preston Nort End”də icarə əsasında oynayıb. Mərkəz müdafiəçisi Niderlandın U-21 yığmasında da çıxış edir.

Batumi "Dinamo"sunun və Gürcüstan yığmasının yarımmüdafiəçisi Zuriko Davitaşvili isə karyerasını Fransada davam etdirəcək. Liqa 2-də mübarizə aparan "Bordo"nun rəsmi saytı xəbər verir ki, 21 yaşlı oyunçu cari mövsümün sonuna qədər icarəyə götürülüb. Anlaşmada nəzərdə tutulan bəndə əsasən "Bordo" sonradan gənc oyunçunun transfer hüquqlarına da yiyələnə bilər.

Tiflis "Dinamo"sunun yetirməsi olan Davitaşvili Rusiyanın "Rubin", "Rotor" və "Arsenal" klublarında da çıxış edib. Onun Batumi təmsilçisi ilə müqaviləsinin müddəti 2024-cü ilin yayına qədərdi.