“Potensialı və bacarığı buna imkan verir” – "Qarabağ"ın yeni transferi haqda
“Qarabağ”ın sonuncu yoxlama oyunlarında parlayan futbolçulardan biri də Davud Mənsumovdu.
18 yaşını ötən ilin avqustunda tamamlayan hücumçu həm “Kəpəz”in, həm də “Zirə”nin qapısına yol tapdı. “Köhlən atlar”In baş məşqçisi Qurban Qurbanov “Zirə” ilə oyundan sonra onun haqqında belə deyib:
“Davudu komandaya bir az gec cəlb etmişik. Üç aydı bizimlə məşq edir. Aftandil Hacıyev onu bizə təklif etmişdi ki, perspektivli uşaqdı. Hələ gəncdi. İstəyirik ki, kollektiv içində böyüsün”.
Davudun hansı xüsusiyyətləri sizi cəlb edir? Sizcə, “Qarabağ”ın əsas komandasına kömək edə bilərmi? “Football-plus.az” bu sualları “Qarabağ” Futbol Akademiyasının əlaqələndiricisi Aftandil Hacıyevə ünvanlayıb:
“Davud üzərində çalışan, ağıllı, sürətli və qol duyumu olan futbolçularımızdandı. AFFA U-19 liqasında bombardirlər yarışında öndədi, bacarıqlı futbolçudu. Ancaq hələ üzərində çox çalışmalıdı. Qurban müəllim artıq onu əsas komandada sınaqdan keçirir. Rəsmi oyunlarda nə vaxt oynaya biləcəyi ilə bağlı qərarı o verəcək. Davud da məşqçilərin güvənini qazanmaq üçün qol vurmaqla yanaşı, oyunboyu və məşqlərdə fəal olmalıdı. Potensialı və bacarığı buna imkan verir”.
ƏSƏD SEYİDOV
