Terim ilk oyunda uduzdu, Merih Dəmiral öz qapısına qol vurdu!
Səudiyyə Ərəbistanı çempionatının 14-cü turunda Fatih Terimin çalışdırdığı ''Əl-Şabab'' Merih Dəmiralın şərəfini qoruduğu ''Əl-Əhli''nin qonağı oldu.
''Football-plus.az'' xəbər verir ki, ''İmperator''un Səudiyyə Ərəbistanı çempionatındakı debütü uğurlu alınmadı. Meydan sahiblərinin artıq 44-cü saniyədə qol vurduqları qarşılaşmada ''Əl-Əhli'' 48-ci dəqiqədə 3:0 öndə idi. Qonaqların gücü yalnız fərqi minimuma endirməyə yetdi.
Maraqlıdı ki, Merih avtoqol müəllifi oldu. Terimin çempionatdakı debütündə Türkiyə yığmasının üzvünün öz qapısına qol vurması diqqət çəkdi. Amma istənilən halda ''Əl-Şabab'' 2:3 hesabı ilə uduzdu və komandanın çempionatda qələbəsiz seriyası 4 oyuna yüksəldi.
Xatırladaq ki, bu kollektiv ''İmperator''un başçılığı altında rəsmi olaraq ilk oyununu yanvarın 6-da keçirmiş və ölkə kubokunda ''Əl-Fayha''ya 2:1 qalib gəlmişdi. Bu dəfəki matçın ardından Merih Terimlə şəkil çəkdirərək öz ''instaqram'' səhifəsində paylaşdı. Oyunsonrası mətbuat konfransında isə Terim bunları dedi:
''Birinci dəqiqədə qol buraxdıqdan sonra oynamaq hər zaman çətin olur. Ümumiyyətlə ilk 60 dəqiqədə çox zəif təsir bağışladıq. Məşqçilik karyeramda mənim klublarımın ilk 60 dəqiqədə bu dərəcədə zəif oynamasını çoxdandı görməmişdim. Həmin müddətdə 3 yox, daha çox top buraxa bilərdik. Düzdü, son yarım saatda çox yaxşı oynadıq və hətta bərabərliyə də nail ola bilərdik. Bu gün həm fərdi, həm də komanda şəklində çox səhvlərə yol verdik. Üzərimizdə daha çox çalışmalıyıq. Oyunumuzu, psixologiyamızı, lazım gəlsə hətta oyunçularımızı da dəyişdirməyə ehtiyacımız var. Təbii ki yeni oyunçular gətirmək və komandanı gücləndirmək üçün rəhbərliklə tez-tez toplantılar keçiririk''.
ƏLİ
Digər xəbərlər
