Futbol tarixinə damğa vurmuş ''Real'' və Braziliya yığmasının sabiq üzvü Roberto Karlosdan xəbər var. Əfsanəvi futbolçu 15 illik həyat yoldaşı Marianna Lukon ilə boşanır.

''Football-plus.az'' xəbər verir ki, boşanma prosesi çox ağır keçir. Çünki Karlosun sərvəti təxminən 160 milyon avrodu. Bu məbləğ onunla yoldaşı arasında bərabər bölünməlidi. Karlos Lukon ilə 2009-cu ildə ailə qurub və onların iki qızı var. Ünlü futbol adamı boşanma prosesi üzündən hələ ki, ''Real''ın Valdebebasda yerləşən bazasında yaşamaq məcburiyyətindədi. Çünki ona məxsus bir villada həyat yoldaşı ilə uşaqları, digər villada isə həyat yoldaşının qohumları yaşayır.

Onların münasibətlərinin konkret nəyə görə pozulduğu haqda məlumat verilməsə də, hər ehtimala qarşı xatırladaq ki, Karlosun 7 fərqli qadından ümumilikdə 11 uşağı var! Yəni Marianna Lukondan başqa onun daha 6 qadından 9 uşağı var. Karlos bununla bağlı bir neçə il öncə verdiyi məşhur müsahibədə qadınlardan birinin Meksikada, birinin Macarıstanda, birinin İspaniyada, qalanlarının isə Braziliyada yaşadığını etiraf etmişdi.

Hazırda ''Real''ın rəsmi səfiri kimi çalışan 51 yaşlı Karlos Madrid nəhəngində 11 il (1996-2007) çıxış edib və bu müddətdə 3 dəfə ÇL-in, 4 dəfə La Liqanın qalibi olub.

ƏLİ