“Hazırda İsrail liqasından da bir klubla danışıqlarımız davam edir” – Turan da “Kəpəz”dən ayrılır?
Orxan Əliyevin ardından daha bir futbolçunun “Kəpəz”dən ayrılacağı ilə bağlı iddialar var. Söhbət müdafiəçi Turan Manafovdan gedir.
Onun danışıq apardığı klublar arasında vaxtilə şərəfini qoruduğu “Səbail” də var. Mövsümün gedişində Gəncə təmsilçisinə qoşulan Manafovun xaricə yollanmaq arzusunun olduğunu da unutmayaq. İndiki məqamda Turan “Kəpəz”dən ayrılmaq istəyində olsa da, klub futbolçunu buraxmaq istəmir.
Bəs 26 yaşlı futbolçu mövsümün geri qalan hissəsini harda keçirəcək? Turanın meneceri Kamran Şahverdiyevin “Football-plus.az”a açıqlaması:
“Bəli, Turana maraq var. Digər komandalarla ilkin əlaqələr qurulub. Onun hazırda müqaviləsi olduğundan, sadəcə, klubu uyğun görəcəyi təqdirdə “Kəpəz”i tərk edə bilər. Təbii ki, klub da əsas heyət oyunçusunu buraxmaq istəmir. Lakin müəyyən ödəniş əvəzində Turan yeni komandaya keçə bilər. “Kəpəz”ə müqavilədə yazılan pul ödənilərsə, ordan ayrıla bilər. Hazırda İsrail liqasından da Manafovla bağlı bir klubla danışıqlarımız davam edir”.
RÖYANƏ OĞUZ
Digər xəbərlər
