Məhşur oyunçuların Səudiyyə Ərəbistanına axınını davam etdiyi bir müddətdə 2 futbolçunun keçidində ciddi problem yaranıb.

"Football-plus.az" xəbər verir ki, söhbət ''Çelsi''yə lazım olmayan Hakim Ziyeş və ''İnter''in satmağa razı olduğu Marselo Brozoviçdən gedir. Hər iki futbolçu Kriştiano Ronaldonun yanına - ''Əl-Nəssr''ə yollanmağın bir addımlığında idi.

Fransanın ''Foot Mercato'' nəşrinin yazdığına görə Ziyeş həm tibbi müayinədən keçə bilməyib, həm də onun maaş tələbi ərəbləri qane etmir. Təcrübəli futbolçunun tibbi müayinə zamanı dizində problem aşkarlanıb. Bundan başqa onun illik 12-13 milyon avro məvacib istəməsi də danışıqların praktiki olaraq dayanmasına səbəb olub. ''Əl-Nəssr''in ən qısa müddətdə bu transferden vaz keçməsi xəbərini ''Çelsi''yə çatdıracağı gözlənilir. Londonlular bu satışdan 15 milyon avro qazanmağı planlaşdırırdılar.

Brozoviçə gəlincə, ərəblər əvvəlcə 23 milyon avro təklif etmişdilər. Amma ''Əl-Nəssr'' rəhbərliyi sonradan təklifi 15 milyon avroya endirdi. Bu isə ''İnter'' rəhbərliyini qane etmir. Daha öncə iddia olunurdu ki, ''Əl-Nəssr'' təcrübəli xorvatiyalı yarımmüdafiəçiyə 3 il üçün 100 milyon avro məvacib ödəməyə hazırdı.