Usik Mazepanın qılıncını göstərdi
Ukraynalı Aleksandr Usiklə britaniyalı Tayson Füri arasındakı 2-ci döyüş də arxada qaldı. Ər-Riyadda keçirilən və 12 raund davam edən döyüşün qalibi Usik oldu. Hakimlər yekdilliklə onu qalib saydı. Beləliklə, 37 yaşlı ukraynalı “WBA-Super”, WBO, IBO, WBC və “The Ring” versiyası üzrə çempion titullarını qorudu.
Xatırladaq ki, mayın 18-də keçirilən ilk döyüşdə də Usik qalib gəlmişdi. Revanş görüşündə boks tarixində ilk dəfə süni intellektdən də istifadə olundu. Süni intellekt hakimi də üstünlüyü ukraynalıya verdi.
Füri belə hesab edir ki, hakimlər qələbəni ukraynalıya hədiyyə edib:
“Çoxları deyir ki, Usik iradə gücü hesabına qalib gəldi. Onda heç bir iradə görmədim. Ancaq hakimlər masasından ona hədiyyə vermək istəyən Milad ruhu hiss etdim. Erkən Milad hədiyyəsi idi”.
Maraqlıdı ki, Usik döyüşün ardından rinqdə məşhur ukraynalı getman İvan Mazepanın orijinal qılıncını nümayiş etdirib. Bununla da hələ 300 il əvvəl rus işğalçılara qarşı azadlıq mübarizəsinə qalxmış kazakların əsla təslim olmayacağını göstərib.
Usikin döyüşsonrası fikirləri:
“24 raunddan sonra Füriyə münasibətdə nə hiss edirəm? O, mənim yaxın dostumdu. Bu oğlana hörmət edirəm, çox sərt rəqibdi. Füri məni daha güclü etdi. Bəli, o, çox danışır, ancaq bu, sadəcə, şoudu. Qulaq asın, 24 raund e... Bu artıq bir tarixdi”.
Digər xəbərlər
