İtaliyalı məşqçilərin Xorvariyaya axını davam edir.

Zaqreb ''Dinamo''su Nenad Byelitsa ilə yollarını ayırdığını açıqladı. Bu mütəxəssis baş məşqçi postuna sentyabrın sonlarında Sergey Yakiroviçin istefasından sonra gətirilmişdi.

Xorvatiya çempionu Byelitsa ilə Çempionlar Liqasında bəzi diqqətçəkən nəticələr əldə etsələr də, daxili çempionatda vəziyyət düzəlmədi. ''Dinamo'' 18 turdan sonra lider ''Riyeka''dan 7 xal geridədi. 2022/23-də ''Trabzonspor''u çalışdırmış və cəmi 16 oyundan sonra istefaya göndərilmiş Byelitsa daha öncə 2018-20-ci illərdə də ''Dinamo''da işləmişdi.

Zaqreb təmsilçisi artıq yeni baş məşqçisini açıqlayıb. Bu, Fabio Kannavarodu. Əfsanəvi italiyalı futbol adamı yanvarın 3-də ictimaiyyətə təqdim olunaraq rəsmən yeni işinə başlayacaq. Düzdü, Kannavaronun futbolçu kimi uğurları daha çoxdu. Təkcə bir faktı vurğulayaq ki, o, XXI əsrdə ''Qızıl top''u qazanmış yeganə müdafiəçidi. Məşqçi kimi isə ''Quançjou Everqrand'' ilə qazandığı ölkə çempionluğunu nəzərə almasaq onun başqa ciddi uğuru yoxdu.

Onu da bildirək ki, Kannavaro bu mövsüm Xorvatiyanın elitasında işləyən 4-cü italiyalı məşqçi olacaq. Hazırda ''Osiyek''i Federiko Koppitelli, ''İstra''nı Paolo Trametsani, ''Hayduk''u isə Cennaro Qattuzo çalışdırır.

ƏLİ