“Relevo” nəşrinin yaydığı xəbərə görə, Kərim Benzema karyerasını bitirmək üzərində düşünür. 36 yaşlı fransalı hələ son qərarını verməsə də, “Əl-İttihad”la 2026-cı ilə qədər olan müqaviləsinin sonuna qədər oynamaması tam mümkündü. Hücumçunun artıq sonrakı fəaliyyətlə bağlı planı var.

“Relevo”ya inansaq, Benzema hələ birmənalı şəkildə qərar verməyib, ancaq yaşlandığını hiss edir. Ən böyük simptom odu ki, Kərim oyun rutinindən yorulub. Gec məşqlər onu bezdirib – güclü istilər üzündən “Əl-İttihad” yalnız axşam saatlarında məşqə çıxır.

Bundan başqa, Benzema hələ də Səudiyyə Ərəbistanındakı arzuolunmaz debütün təəssüratından ayrıla bilməyib. Xatırladaq ki, “Qızıl top”un sahinin məhsuldarlığı yeni mərhələnin əvvəlində çox aşağı idi, baxmayaraq ki, bu liqada ən yaxşı müqavilələrdən birinin sahibi idi, amma həmin pulu heç də doğrultmurdu. Buna görə də həm azarkeşlərdən, həm də məşqçilərdən, konkret Marselo Qalyardodan kəskin tənqid eşidirdi. Argentinalı mütəxəssis hətta forvardın müqaviləsinin ləğvini istəyirdi, ancaq Kərim həmin savaşdan qalib ayrıldı və klubda qaldı, əvəzində baş məşqçi “Əl-İttihad”dan qovuldu. İndi vəziyyər qaydasına düşsə də, fransalı ulduz mental baxımdan hələ də bərpa olunmayıb.
Nəhayət, Benzemanı karyerasını bitirməklə bağlı düşünməyə vadar edən daha bir səbəb var – o, Madriddə yaşamağı arzulayır. Forvardın artıq Səudiyyə Ərəbistanındakı həyata uyğunlaşdığı deyilsə də, o, daha çox öyrəşdiyi İspaniyada yaşamağı üstün tutur – orda evi, ailəsi, illərlə formalaşan ətrafı var.

Hər halda, Benzemanın müqavilə müddətinin sonuna qədər çalışması daha çox ehtimal olunan variantdı. “Relevo” yazır ki, “Əl-İttihad”da ulduzun şübhələrindən xəbərdar olsalar da, əmindilər ki, o, 2026-cı ilə qədər qalacaq. Və hətta Kərim mövsümün sonunda klubu tərk etsə belə, sahiblər bunu böyük problem saymayacaq – onun gedişi “Əl-İttihad”ın əməkhaqqı fonduna 100 milyon avro qənaət etməsinə imkan yaradacaq.

Karyerasını nə vaxt bitirəcəyindən asılı olmayaraq, Kərimin gələcəklə bağlı planı var. Onun növbəti dayanacağı həyatının əsas klubu olacaq – “Real”ın səfiri statusunu daşıyacaq. Benzema artıq “kral klubu”nun rəhbərliyi ilə bütün məsələləri razılaşdırıb, madridliləri ərəb dünyasında təmsil edəcək.

“Real”da Yaxın Şərqi perspektivli pul istiqamətlərindən biri sayırlar – deyilənə görə, “kral klubu” hər yerdə yerli səhmdarlarla sponsorluq müqavilələri ilə bağlı danışıq aparır. Bundan başqa, artıq SAIB (Səudiyyə Ərəbistanının investisiya bankı və “Fly Emirates” kimi nəhənglər “Real”la çalışır. Benzemanın “Real”dakı varlığı əlaqələri yaxşılaşdırmaq baxımından daha da yardım edərdi.

O da xüsusi qeyd olunur ki, Kərim “Real”ın prezidenti Florentino Pereslə əla münasibətlərə malikdi. “Relevo” fransalını ispaniyalı funksionerin “sevimli uşağı”, həyatındakı xüsusi futbolçulardan biri adlandırır.

Hər şeydən belə görünür ki, Benzema gələcəyinə görə narahat olmaya bilər, axı hər şey aydındı. O hansı variantı seçir-seçsin, karyerasını futbolçu və ya səfir kimi Yaxın Şərqdə davam etdirəcək.