Yanvarın 9-da İtaliya kubokunun 1/4 finalına start verildi. Çərşənbə axşamı bu mərhələnin ilk oyunu keçirildi.

“Football-plus.az” xəbər verir ki, reqlamentə əsasən, turnirin yarımfinalına qədər olan bütün mərhələlərinin qalibləri biroyunluq mübarizə nəticəsində müəyyənləşir. “Fiorentina” 1/8 finalda öz meydanında “Parma”nın güclü müqaviməti ilə qarşılaşmışdı. B seriyası təmsilçisi ilə matçın əsas və əlavə vaxtı 2:2 nəticələnmiş və penalti seriyasında 4:1 hesablı üstünlük qazanan florensiyalılar çətinliklə 1/4 finala adlamışdılar. “Bolonya”nın bu mərhələyə çıxacağı gözlənilmirdi. Ona görə ki, Tyaqo Mottanın komandası 1/8 finalda son iki mövsümdə kuboku muzeyinə aparan “İnter”lə qarşılaşmışdı. Mərhələnin aşkar favoriti sayılan milanlılar evdə bolonyalıların arxa xəttini yarmaqda çox çətinlik çəkmişdilər. Əsas vaxt qolsuz bitdiyindən bu cütdə də qalibi müəyyənləşdirmək üçün əlavə vaxta ehtiyac duyulmuşdu. Və çoxlarının gözləmədiyi halda 2:1 hesabıyla qalib gələn “Bolonya” A seriyasının liderini sensasiyalı şəkildə 1/4 finala buraxmamışdı. Qeyd edək ki, həm “Fiorentina”, həm də Mottanın komandası cari mövsümdə yetərincə uğurlu çıxış edir: “Fio” ölkə çempionatının ilk dövrəsini 33 xalla 4-cü, “Bolonya” isə 32 xalla 5-ci yerdə başa vurub. Maraq üçün bu komandalar arasında baş tutan oyunu da xatırladaq. 12-ci turun ötən il noyabrın 12-də Florensiyada keçirilən matçı ev sahiblərinin 2:1 hesablı qələbəsi ilə nətilənmişdi.

“Bolonya” bu rəqibi ilə kubok oyununda da səfərdə qarşılaşdı. Mərhələnin səviyyəsini və yarımfinala vəsiqənin oynanıldığını nəzərə alan komandalar meydana yetərincə güclü heyətlə çıxdılar. “Artemio Franki”də keçirilən matç çox uzun – hissələrə əlavə olunan vaxtı nəzərə almasaq, 120 dəqiqə çəkdi. Qonaqların bu müddətdə topa 62 faiz sahib olması diqqətdən yayına bilməzdi. Amma digər əsas statistik göstəricilərdə təxmini bərabərlik qeydə alındı. Tərəflər bir-birinin qapısına hərəyə 5 dəqiq zərbə endirdilər. Qapıçılar bütün zərbələrin qarşısını almaqla qolsuzluğun əlavə vaxtın sonuna qədər davam etməsinin əsas səbəbkarı oldular. Amma zərurətə çevrilən penalti seriyası heç-heçə nəticələnə bilməzdi. “Fiorentina”nın 5 oyunçusunun bütün cəhdləri uğurlu alındı. “Lotereya”da yalnız “Bolonya”nın avstriyalı müdafiəçisi Poşun zərbəsi qol olmadı. Beləliklə, Vinçentso İtalyanonun komandasının dadına yenə penalti seriyası çatdı.

1/4 final
Fiorentina – Bolonya 0:0, p. – 5:4
Fiorentina: O.Kristensen, Biraqi (Parizi, 72), Lukas Martines (Mina, 110), Ranyeri, Milenkoviç, Kayode, Dunkan (Mandraqora, 72), Barak (Bonaventura, 60), Lopes, İkone (Nzola, 60), Beltran (Artur, 77).
Bolonya: Skorupski, Poş, Lukumi (Kalafyori, 87), Beukema, Kristiansen, Fröyler, Ferqyuson, Eybişer (Moro, 87), Orsolini, Salemakers, Zirkzee.
Latsio – Roma 1:0
Milan – Atalanta 1:2
“Yuventus” – “Frozinone” oyunu bu gün keçiriləcək.