Ruanda da Bakının yerində olmaq istəyir
Həftəsonu Ruandanın paytaxı Kiqalidə Beynəlxalq Avtomobil Federasiyasının (FIA) Baş Assambleyası keçirilib. Həmin vaxt “Red Bull”un pilotu Maks Ferstappenə 2024 mövsümün çempionluq kuboku da təqdim olunub.
27 yaşlı niderlandlı pilot bu il keçirilən 24 yarışın 9-da qələbə qazanmaqla 437 xal toplayıb və ardıcıl 4-cü dəfə dünya çempionu olub. Mühəndislər kubokunda isə Böyük Britaniya təmsilçisi “Maklaren” qələbə qazanıb.
Bu arada Runada prezidenti Pol Kaqame ölkəsinin “Formula-1” üzrə dünya çempionatını qəbul etmək üçün ərizə verəcəyini bildirib:
“Rəsmi şəkildə bəyan edirəm ki, Ruanda yarış həyəcanını Afrikaya qaytarmaq üçün “Qran-pri” keçirməklə bağlı müraciət edəcək. Stefano Domenikaliyə (“Formula-1”in prezidenti – red.) və federasiyaya müzakirələr zamanı nail olduğumuz tərəqqiyə görə minnətdaram. Sizi əmin edirəm ki, bu təşəbbüsə bütün ciddiliyimiz və məsuliyyətimiz ilə yanaşacağıq”.
Hökumətin planlarına Kiqalinin 40 kilometrliyində, Buqesera hava limanının yaxınlığında yeni trassın tikintisi də daxildi. 2026-cı ildə istifadəyə verilməsi gözlənilən trassın layihəsini “Formula-1”in sabiq pilotu Aleks Vurts cızacaq.
Ruandada yarış keçirilməsi ideyasını FIA prezidenti Məhəmməd bin Sulayem və yeddiqat dünya çempionu, “Ferrari” pilotu Lüis Hemilton da dəstəkləyib. CAR “Qran-pri”si 1994-cü ildə təqvimdən çıxarılandan sonra Afrikada “Formula-1” yarışları keçirilməyib.
Digər xəbərlər
