“Formula-1” üzrə dünya çempionatında 2022 mövsümünün qalibi artıq bəllidi.

Xəbər verdiyimiz kimi, “Red Bull”un niderlandlı pilotu Maks Ferstappen ardıcıl ikinci dəfə çempionluğu bayram etdi. Amma avtoidman dünyası ilə bağlı bir-birindən maraqlı xəbərlər gəlməkdədi.

Beynəlxalq Avtomobil Federasiyasının (FIA) oktyabrın 10-da ötən il üçün maliyyə hesabatını açıqlamasından xəbərdarsız. Həmin hesabatdan belə aydın oldu ki, “Red Bull” və “Aston Martin” büdcə limiti ilə bağlı müəyyən pozuntulara yol versələr də, bunlar prosedur xarakterlidi və komandaların ümumi hesabda yerini itirməsi üçün əsas sayıla bilməz.

Amma “Maklaren”in rəhbəri Zek Braun belə qənaətlə razı deyil. O, Beynəlxalq Avtomobil Federasiyasına yazdığı məktubda “Red Bull”un büdcə limitini aşmasını fırıldaqçılıq kimi qiymətləndirib: “Xərcləri aşan istənilən komanda həm ötən il, həm də bu il bolidi hazırlayarkən ədalətsiz üstünlük qazanıb. Beynəlxalq Avtomobil Federasiyası “Formula-1”in bütövlüyünü qorumaq istəyirsə, bu hərəkətə görə komandaya cəza verməlidi”.

Qurumun prezidenti Məhəmməd ben Sulayemə ünvanlanan məktubun surəti “Formula-1”in prezidenti Stefano Domenikaliyə də göndərilib.
Bu arada “Haas”ın sahibi Cin Haas komandanın pilotu Mik Şumaherin əsas probleminin nə olduğunu açıqlayıb: “Bu idman növündə yeni başlayan pilot kimi maşınları qırırsansa, bu yolverilməzdi. Maşınlar yetərincə bahadı. Düşünürəm ki, Mik böyük potensiala malikdi. Ancaq bilirsiz ki, onun çoxlu maşını sıradan çıxarması bizə baha başa gəlib. Sadəcə, bu qədər pulumuz yoxdu. Məsələn, Maks Ferstappen kimi komandaya çoxlu xal qazandırır və bəzən maşını qırırsansa, bunun öhdəsindən gəlmək olar. Ancaq sən heç ilk “10-luğ”a düşmür və maşınları qırırsansa, vəziyyət çətinləşir”.

KİV-in yaydığı xəbərə görə, əfsanəvi Mihael Şumaherin oğlu təkcə 2022-ci il ərzində maşınlara 5 milyon dollar zərər vurub. 23 yaşlı almaniyalı pilot sona 4 mərhələ qalmış 12 xalla şəxsi hesabda 16-cı yeri tutur. Onun komanda yoldaşı Kevin Maqnussen isə 22 xalla 14-cü yerdədi. Şumaherin Amerika komandası ilə müqaviləsinin müddəti cari mövsümün sonunda bitəcək.

Cari mövsümdə Ferstappenin kölgəsində qalan “Mersedes”in pilotu Lüis Hemilton da maraqlı açıqlama verib. Yeddiqat dünya çempionu Almaniya komandasında uzun müddət qalmaq istəyir: “Burda özümü rahat hiss edirəm. Məşğul olduğum iş xoşuma gəlir. İrəlidə bizi çox iş gözləyir, hələ çox zirvə fəth etməliyik. Yaxın vaxtlarda heç bir başqa komandaya keçməyi planlaşdırmıram. Mümkün olduğu qədər uzun müddət “Mersedes”də qalmaq istəyirəm. Ümumilikdə həyatımın sonuna qədər burda qalmaq niyyətindəyəm. Bunu heç müzakirə etməyə dəyməz. Çox güman, menecer roluna yiyələnəcəm. Ona görə ki, komandanın inkişafına daxildən də yardım etmək istəyirəm”.

Xatırladaq ki, Hemilton “Mersedes”ə 2013-cü ildə “Maklaren”dən keçib və Almaniya komandasının heyətində 82 dəfə fəxri kürsünün ən yüksək pilləsinə qalxmaqla altı dünya çempionluğu qazanıb.