“Araz-Naxçıvan” Misli premyer-liqasının 15-ci turunda “Turan Tovuz”a minimal hesabla qalib gəldi.

“Football-plus.az” xəbər verir ki, naxçıvanlıların baş məşqçisi Elmar Baxşıyev oyunsonrası mətbuat konfransında jurnalistlərin suallarını cavablayıb.

- Ağır oyun alındı. Bilirdik ki, kimə qarşı oynayacağıq. "Turan Tovuz" bu mövsüm iddialıdı, meydanda yaxşı işlər görür. Komandanı çətin oyuna hazırlamışdıq. Şükürlər olsun ki, istədiyimizə nail olduq. Yolumuza davam edirik.

- Xal fərqini bir qədər də artırdız. Turnir cədvəlində rahatlıq olacaqmı?
- İlk turdan komandanın üzərində gərginlik yoxdu. İşimizi stressdən uzaq etməyə çalışırıq. Keyfiyyətli komandamız var. Futbolçular daha məzmunlu oynamağa çalışır.

- "Araz-Naxçıvan" birinci liqada oynayanda baş məşqçi Əsgər Abdullayev idi. Azarkeşlər ona deyirdilər ki, “1:0 olsun, bizim olsun” prinsipindən vaz keçin. Sizdə də belədi. Bu məqam sizi narahat etmir?
- Jurnalistlərdə belə fikir formalaşıb ki, "Araz-Naxçıvan" həmin prizmadan yanaşır. Amma hər oyunda 6-7 epizoda giririk, dəyərləndirmədə axsamalar var. Komanda şəklində məşqlərdə işlədiyimiz elementləri oyunda görürük. Qarşıdakı matçlarda hücum planında daha kreativ ola bilərik.

- Bazar günü "Neftçi" - "Qarabağ" matçı var. Hansı nəticənin qeydə alınmasını istəyirsiz?
- Daha çox öz komandamıza köklənmişik. Futbolçulara da deyirəm ki, daha çox özümüzü düşünək. Bizim üçün hər oyun derbidi.

- Bu mövsüm Kurban Berdiyevi artıq iki dəfə məğlub etmisiz. Təcrübəli mütəxəssisi məğlub etməyiniz özünəinam verirmi?
- Özüm futbolçulardan güc alıram. Məşq prosesində enerjini komandadan alıram. Onlar mənə güc verir. Biz də qarşılıqlı şəkildə onlara qaytarırıq.

ƏSƏD SEYİDOV