“Sumqayıt” Misli premyer-liqasının 17-ci turunda “Qarabağ” “Sumqayıt”ı darmadağın etdi - 5:0.

“Football-plus.az” xəbər verir ki, qonaqların baş məşqçisi Vaqif Cavadov oyunsonrası mətbuat konfransında bunları dedi.

- Bu gün çox yaxşı komandaya qarşı oynadıq. Son on ildə ən formada, irəlidə gedən kluba qarşı mübarizə apardıq. Futbolçuları təbrik edirəm. Bizim üçün təcrübədi. Belə komandaya qarşı oynamaq o deməkdi ki, futbolçular yuxarı pillələrdə oynamaq üçün işləməlidi. Bu bir siqnaldı. Məğlub olmağımıza baxmayaraq, futbolçulardan razıyam. Səhvlərdən nəticə çıxaracaq, gələcək oyuna hazırlaşacağıq. Hazırlaşmaq üçün üç günümüz var.

- Rəşad Əzizlini meydana buraxmamağınızın səbəbi nədi?
- Rəşad Əzizli ilə heç bir problem yoxdu. Mən gələndə komandaya yeni qoşulmuşdu. Onun potensialına bələdəm. Şans yarananda Rəşad Əzizliyə və daha da gənc qapıçılara şans verəcəyik.

- Mövsümün sonuna qədər komandada qalacaqsızmı? Qalacaqsızsa, heyətlə bağlı dəyişikliklər olacaqmı?
- “Sumqayıt”da 13 əcnəbi futbolçu var. Əlavələr ola bilər. Mən hara gəldiyimi bilirdim. Futbolçuların oyunlarına bələdəm. Bir oyun məğlub olmaqda faciəli nəsə yoxdu. Öz işimizə davam edirik.

ƏSƏD SEYİDOV