A seriyasının 14-cü turunda nəzərdə tutulan oyunlardan biri sona çatdırılmadı. Baş tutan matçlarda qeydə alınan nəticələrdən sonra isə “Napoli”nin liderliyinin davam etdirdiyini ilk növbədə bildirək.

Bazar günü Florensiyadakı matçın nəticəsi maraqla gözlənilirdi. Yerli “Fiorentina” çempionatın əvvəlki 7 oyununda maksimum nəticə göstərməklə lideri 28 xalla izləyən 4 komandadan biri idi. Florensiyalılar kimi “İnter”in də hesabında bu qədər xal vardı. Son çempion üçün səfər oyununun asan keçməyəcəyi aydın məsələ idi. Təəssüf ki, ilk hissədə baş verən hadisə matçın dayandırılmasına və bir neçə dəqiqə keçəndən sonra təxrə salınmasına səbəb oldu. Yox, buna azarkeşlərin yolverilməz hərəkət və ya davranışları şərait yaratmadı. 17-ci dəqiqədə meydan sahiblərinin yarımmüdafiəçisi Bove huşunu itirərək qazona yıxıldı. Hakim Daniele Doveri dərhal oyunu dayandırdı və həkimlər 22 yaşlı futbolçuya ilkin yardım göstərməyə başladılar. Bu məqamda futbolçuların Edoardonu əhatəyə almaqla kameraların hədəfinə düşməsinə imkan verməməsi diqqətdən yayınmadı. Onlardan bəziləri göz yaşlarına hakim ola bilmirdi. Bir neçə dəqiqədən, daha dəqiqi 5 dəqiqədən sonra təcili yardım maşını meydana daxil oldu və Bove xəstəxanaya aparıldı.

Qeyd edək ki, “Fiorentina”nın oyunçusu Ranyeri stadionda olan maşının meydana bir qədər gec daxil olmasından narazılığını kəskin şəkildə ifadə etdi: onun emosiyalarını cilovlaya bilməməsi və tibb işçilərindən birinin yaxasından yapışması diqqətdən yayınmadı. Referi Doveri oyunçuların paltardəyişmə otaqlarına yollanmasına qərar verdi. Çox keçmədən matçın rəsmi nümayəndə heyətinin qərarı ilə qeyri-müəyyən müddətə təxirə salındığı açıqlandı. Edoardonun düşdüyü vəziyyət və xəstəxanadakı durumu ilə bağlı yayılan məlumatı da nəzərinizə çatdıraq. İlkin müayinələr nəticəsində onun epileptik ürəktutma keçirdiyi və klinikada sərbəst tənəffüs etdiyi açıqlandı. Xəstəxananın reanimasiya şöbəsində olan gənc futbolçunun mərkəzi sinir və ürək-damar sisteminin ciddi xəsarət almadığı və növbəti müayinələrdən keçiriləcəyi də bildirildi. Bax belə. Çoxlarının səbirsizliklə gözlədiyi “Fiorentina” – “İnter” oyunu ilk hissədəcə yarımçıq qaldı. Yerli mənbələr matçın qalan hissəsinin böyük ehtimalla gələn ilin fevralında keçiriləcəyini xəbər verir.

Turun diqqəti daha çox cəlb edən matçları sırasında “Napoli”nin növbəti qələbəsini qeyd edək. Lider üçün “Torino” ilə səfər oyunu asan keçmədi. İlk hissədə Kvaratsxeliyanın ötürməsi ilə Maktomineyin vurduğu qol nəticəni müəyyən etdi. Yeri gəlmişkən, İtaliyaya yayda “Mançester Yunayted”dən gələn 27 yaşlı şotland yarımmüdafiəçi noyabrın 10-da “İnter” ilə səfər oyununda (1:1) da qapıya yol tapmışdı. Avrokuboklarda çıxış etməyən Antonio Kontenin komandası növbəti çətin qələbə ilə liderliyini davam etdirdi.

Neapolluları cədvəldə müşayiət edən komandalardan “Latsio” Parma səfərindən paytaxta əliboş döndü. Marko Baroninin komandası 1:3 hesabıyla uduzdu. Bununla da romalıların 5 oyunluq qələbə seriyası qırıldı.

“Milan” ardıcıl iki heç-heçədən sonra qalib gəlməyi bacardı. Ölkə nəhəngi evdə “Empoli”ni 3 cavabsız qolla məğlub etdi. İtaliyanı Çempionlar Liqasında təmsil edən “Bolonya” da rəqibi “Venetsiya”ya 3:0 hesabıyla qalib gəldi.

Amma “Yuventus” ardıcıl ikinci dəfə rəqibi ilə heç-heçəyə razılaşdı. Turinlilər Leççedə yerli komandanın güclü müqaviməti ilə üzləşdilər. Amma ədalət naminə Tyaqo Mottanın komandasının son həftələr heyətlə bağlı ciddi problem yaşadığını qeyd etməmək olmur. Leççedə xüsusilə hücum planında çətinlik çəkən qonaqlar ikinci hisədə Kambyasonun zərbəsi ilə hesabı açdılar. Lakin meydan sahiblərinin təzyiqi son dəqiqələrdə bəhrə verdi və matç 1:1 hesabıyla nəticələndi. Bu mövsüm A seriyasında hamıdan çox - 8-ci dəfə rəqibi ilə “sülh”ə razılaşan “Yuventus” liderdən 6 xal geri düşdü.
“Udineze” – “Cenoa” matçı 0:2 hesabı ilə sona çatdı. Qonaqların yeni baş məşqçisi Patrik Vieyra komandasının ilk qələbəsinə sevindi.

14-cü tur
Torino – Napoli 0:1
Maktominey, 31. (25060)
Napoli: Meret, Olivera, Buoncorno, Rrahmani, Di Lorentso, Maktominey, Lobotka, Zambo Angissa (Folorunşo, 87), Kvaratsxeliya (Neres, 80), Politano (Spinatsola, 75), Lukaku (Simeone, 88).
Milan – Empoli 3:0
Morata, 19. Reynders, 44; 69. (68725)
Milan: Menyan, Ernandes, Tiav, Qabbya (Pavloviç, 75), Emerson, Musa (Çukvueze, 75), Reynders, Fofana (Loftus-Çik, 75), Leao (Kamarda, 84), Pulişiç, Morata (Abraham, 84).
Bolonya – Venetsiya 3:0
Ndoy, 21-p.; 71. Orsolini, 69-p. (24866)
Bolonya: Skorupski, Miranda, Lukumi, Beukema, De Silvestri (Holm, 50), Moro, Fröyler, Karlsson (Dallinqa, 64), Odqor (Dominqes, 84), Ndoy (Urbanski, 84), Kastro (Orsolini, 64).
Parma – Latsio 3:1
Man, 6. Hac Məhəmməd, 53. Del Prato, 90+1 – Kastelyanos, 81. (22885)
Latsio: Provedel, Luka Pelleqrini, Xila, Romanyoli, Latsari (Maruşiç, 82), Dele-Başiru (Pedro, 46), Rovella (Noslin, 89), Genduzi, İsaksen (Çauna, 65), Zakkanyi, Kastelyanos.
Leççe – Yuventus 1:1
Rebiç, 90+3 - Kambyaso, 63. (27080)
Yuventus: Perin, Danilo, Kalulu, Qatti (Rouhi, 63), Kambyaso, K.Türam (Facoli, 63), Lokatelli, Koopmeyners, Yıldız (Mbanqula, 74), Konseysao (Punyo, 84), Vea.
Kalyari – Verona 1:0
Pikkoli, 75. (16162)
Komo – Montsa 1:1
Engelhardt, 36 – Kaprari, 53-p. (9749)
Udineze – Cenoa 0:2
Pinamonti, 13. Canetti, 68-öz qapısına. (21995)
“Fiorentina” – “İnter” oyunu 17-ci dəqiqədə dayandırılıb və təxirə salınıb.

1. Napoli 14 10 2 2 21-9 32
2. Atalanta 13 9 1 3 34-16 28
3. İnter 13 8 4 1 31-14 28
4. Fiorentina 13 8 4 1 27-10 28
5. Latsio 14 9 1 4 29-17 28
6. Yuventus 14 6 8 0 22-8 26
7. Milan 13 6 4 3 23-14 22
8. Bolonya 13 5 6 2 18-16 21
9. Udineze 14 5 2 7 16-21 17
10. Empoli 14 3 7 4 10-14 16
11. Parma 14 3 6 5 20-22 15
12. Torino 14 4 3 7 16-20 15
13. Kalyari 14 3 5 6 15-24 14
14. Cenoa 14 3 5 6 13-24 14
15. Roma 13 3 4 6 14-18 13
16. Leççe 14 3 4 7 7-22 13
17. Verona 14 4 0 10 17-33 12
18. Komo 14 2 5 7 14-26 11
19. Montsa 14 1 7 6 12-17 10
20. Venetsiya 14 2 2 10 11-25 8

Bombardirlər: Retegi (Atalanta) - 12, M.Türam (İnter), Ken (Fiorentina) - 9, Lukman (Atalanta) - 7.
Növbəti turun oyunları dekabrın 6-9-u aralığında keçiriləcək: İnter - Parma, Atalanta – Milan, Cenoa – Torino, Yuventus – Bolonya, Roma – Leççe, Fiorentina – Kalyari, Verona - Empoli, Venetsiya – Komo, Napoli - Latsio, Montsa - Udineze.

Turun rəqəmi
4 - “Udineze” – “Cenoa” matçında ev sahibləri 85 dəqiqədən çox müddətdə azlıqda oynamalı oldular. Suleymane Ture 4-cü dəqiqədə rəqibə qarşı kobud hərəkətinə görə qarşısında birbaşa qırmızı vərəqə gördü. 21 yaşlı fransalı müdafiəçi cari mövsümdə A seriyasında meydandan ən erkən qovulan futbolçu oldu. Onun bu mövsüm ikinci dəfə belə aqibətlə üzləşdiyini də qeyd edək: Suleymane oktyabrın 30-da keçirilən “Venetsiya” ilə səfər oyununun 53-cü dəqiqəsində də birbaşa qırmızı vərəqə ilə cəzalanmışdı.

Turun ulduzu
Ticani Reynders (Milan) - “Milan”ın “Empoli” üzərində inamlı qələbəsində niderlandlı yarımmüdafiəçinin böyük rolu oldu. Hər hissədə bir qol vuran Reynders əla qol hissiyatına malik olduğunu göstərdi. A seriyasındakı debüt mövsümündə meydana çıxdığı 36 oyunda 3 qol vuran 26 yaşlı Ticani artıq cari mövsümdə qapıya bu qədər yol tapıb.

Turun sitatı
Cüzeppe Marotta, “İnter”in prezidenti: