Bir qədər stajlı futbolsevərlər yəqinki Yuniçi İnamotonu gözəl xatırlayır. Bir dönəm ''Qalatasaray''da da forma geymiş yaponiyalı futbolçunun karyerasını çoxdan bitirdiyini düşünürsüzsə, yanılırsız.

45 yaşlı İnamoto karyerasını yalnız bu günlərdə bitirib! Ən son paytaxt Tokionun Katsuşika bölgəsini təmsil edən ''Nankatsu''nun formasını geyən İnamoto mətbuat konfransı keçirərək qərarını açıqlayıb. Son 2-3 ildə tez-tez futbolla vidalaşmaq barədə düşünsə də, hər dəfə davam etdiyini bildirən veteran futbolçu ''bu il artıq istedadım komandaya yardım etməyə imkan vermir'' deyərək butslarını birdəfəlik mismardan asdığını qeyd edib.

Peşəkar karyerasına vətənində ''Qamba Osaka''da start verən İnamoto daha sonra ''Arsenal'', ''Fulhem'', ''Vest Bromviç'', ''Kardiff Siti'' kimi İngiltərə klublarında top qovub. O, premyer-liqada oynamış və qol vurmuş ilk yaponiyalı futbolçu kimi tarixə düşüb. 2006/07-ni ''Qalatasaray''da keçirən yarımmüdafiəçi daha sonra ''Ayntraxt'', ''Renn''də çıxış etmişdi. 2010-dan bu yana isə o, Yaponiya klublarında top qovurdu. Yaponiya yığmasında 2000-10-cu illərdə forma geyən İnamoto həm də üç DÇ-nin (2002, 2006, 2010) iştirakçısıdı.

ƏLİ