"Şamaxı" Misli premyer-liqasının 16-cı turunda "Turan Tovuz"un meydanından məğlub ayrıldı - 2:3.

"Football-plus.az" xəbər verir ki, "şirlər"in baş məşqçisi Ayxan Abbasov oyunsonrası mətbuat konfransında jurnalistlərin suallarını cavabladı.

- Üzücü məğlubiyyət oldu. Matçı iki hissəyə bölərdim. Birinci hissədə 3-4 qol vura bilərdik. İkinci yarıda rəqibin daha fəal çıxış edəcəyini bilirdik. Hündürboylu futbolçuları meydana buraxdılar. Belədə futbolçularım özünü itirdi. Standart vəziyyətlərdə yaxşı səviyyədə çıxış etmədik.

- İki futbolçuyla yolları ayırdız. Bu, nəylə bağlıdı?
- Bilirik ki, son günlərdə mətbuatda və sosial şəbəkələrdə belə məlumatlar yayılıb. Düzdü, bəzi problemlərlə üzləşmişik. Bu barədə yaxın günlərdə klub tərəfindən rəsmi məlumat veriləcək. Onu deyə bilərəm ki, klub dağılmır. Maddi problem iddia olunan qədər ciddi deyil.

- İkinci hissədə daha yaxşı çıxış edə bilməməyinizin səbəbi nədi?
- Bu gün komanda belə ciddi azarkeş təzyiqi altında ilk dəfə meydana çıxdı. Belə oyunlar keçirdikcə möhkəmlənəcəyik. Kuryoz qollar buraxırıq.

- Altı ay bundan əvvəl "Turan Tovuz"un sevimlisi idiz. Bu gün yenə Tovuzdasız. Hansı hissləri keçirirsiz?
- Tovuzda oynamaq həmişə çətin olur. Burda xeyli oyun keçirmişəm. Premyer-liqamıza belə komandalar lazımdı. Biz heç kimdən geri qalmırıq.

- "Turan Tovuz"a uduzmaq daha ağırdı, yoxsa "Kəpəz"ə?
- Məğlubiyyət məğlubiyyətdi. Bunun fərqi yoxdu. Rəqibin kimliyi önəmli deyil. Əsas odu xal qazanaq. Evdə uduzmaq daha üzücü idi.

- Razılaşaq ki, prinsipial oyun idi. Şamaxıda son dəqiqədə üç, burda isə bir xalı itirdiz. Komandada nə çatmır?
- Hər şeyi təcrübə həll edir. Belə oyunların son dəqiqələrində daha diqqətli olmaq vacibdi. Məncə, bu gün həm təcrübədə, həm də boy hündürlüyünə görə uduzduq.

- Futbolçular hansı səbəbdən komandadan ayrıldı? Sizin istəyinizlə, yoxsa özləri getdi?
- Klubun qərarıyla.

KƏNAN BAHADIR