“Şamaxı” Misli premyer-liqasının 11-ci turunda “Qarabağ”ın meydanından məğlub ayrıldı - 0:3.

“Football-plus.az” xəbər verir ki, “şirlər”in baş məşqçisi Ayxan Abbasov oyunsonrası mətbuat konfransında jurnalistlərin suallarını cavabladı.

- Oyunun çətin keçəcəyini bilirdik. Futbolçularım ilk hissədə öhdəliklərini yerinə yetirdi. İkinci yarıya penaltidən qol buraxmaqla başladıq. Hücumlar etdik. Belədə rəqib yaranan boşluqlardan yararlandı. Klub olaraq belə oyunlara ehtiyacımız var. Üç gündən sonra kubok matçına çıxacağıq. Ondan sonra "Zirə" ilə görüşə hazırlaşacağıq.

- Penalti epizodu haqda nə deyə bilərsiz?
- Hakimlikdən danışmaq istəmirəm. Hər oyun danışıram, artıq özümdən xoşum gəlmir. Toxunuş var idi. Qaydalar deyir ki, topdan sonra rəqib futbolçuya sərt toxunsan, penalti var. Həmin epizodda Adil topu çıxarır və Kaşuk sürətini azaltmır. Bəlkə də ölkəmizdə futbol dəyişib, bizim xəbərimiz yoxdu.

- "Kəpəz"in baş məşqçisi Azər Bağırov hakimlərin ədalətinə inanmadığını deyib. Ötən mövsüm də mübahisəli epizodlar çox olurdu. Hətta ədalət təmsilçilərinə etiraz etmişdiz. Aranızda görüşlər baş tutmuşdu. Bu mövsüm də elə görüşlərin təşkilinə ehtiyac var? Bəlkə bu mövzu Klublar Komitəsinin iclasında müzakirəyə çıxarılsın?
- Hakimlər də səhv edə bilər. Bizə qarşı aqressiyaları da yarana bilər. Reallıq budu ki, performansları yüksəlməlidi. Məsələn, bir epizod mənim üçün çox maraqlıdı. "Kəpəz"in "Turan Tovuz"la oyununda Paçu Liranın ayağını cərimə meydançasında tapdalayırlar. Bu, başqa vaxt dərhal penaltidi. Bəlkə yeni qaydalar var, xəbərimiz yoxdu. Əlbəttə, görüşlər olmalıdı. Hər kəs inkişaf etməlidi. Çempionatımızda kritik oyunlar olur. Hər tur səhvlər təkrarlanır.

ƏSƏD SEYİDOV