“Sabah” premyer-liqanın 16-cı turunda evdə “Qarabağ”la heç-heçə etdi – 1:1.

“Bayquşlar”ın qapıçısı Nicat Mehbalıyev meydana çıxmasa da, “Football-plus.az”ın yeni baş məşqçi Vasili Berezutski və oyun ilə bağlı suallarını cavabladı.

- Səncə, “Qarabağ”la bugünkü heç-heçə ədalətli nəticə oldu?
- Bugünkü oyun bizim üçün çox böyük əhəmiyyət daşıyırdı. Turnir cədvəlində istədiyimiz yerdə deyilik. Xal itirmək vaxtı deyil. Meydana yalnız qələbə üçün çıxmışdıq. Sadəcə, rəqibin keyfiyyətli futbolçuları nəticəyə təsir göstərdi. Bizim də epizodlarımız oldu, “Qarabağ”ın da var idi. Məncə, heç-heçə ədalətli nəticədi. Bilirsiz, “Qarabağ” kimi komandaya qarşı oynayırsansa, hər şeyi gözə almalısan. Düzdü, biz heç bir rəqibdən çəkinmirik. Bütün oyunlara qələbə üçün çıxırıq. Amma rəqibin heyətində keyfiyyətli oyunçular çoxdu. Zubir, Kaşuk, Benzya, Nəriman kimi oyunun nəticəsinə təsir edəcək futbolçuları var. Bir məqam tuturlar və onu qola çevirə bilirlər. Onların keyfiyyətinə bələdəm. Ona görə Azərbaycan reallığında “Qarabağ” da başqa komandalardan daha üstündü.

- Bəlkə onlar sizinlə oyuna fərqli stimulla çıxır?
- İndi turnir cədvəlində olan komandaların hər biri digərinə qarşı stimulla çıxır. Hətta “Kəpəz” bizə, biz onlara qarşı da stimulla oynayırıq. Heç bir rəqibi kiçiltmək olmaz.

- “Sabah”ın turnir cədvəlindəki indiki mövqeyi narahatlığa əsas verirmi?
- Biz də istərdik ki, yuxarı pillələrdə qərarlaşaq. Sadəcə, futbolun belə tərəfləri də olur. Çempionatın ortasında baş məşqçi dəyişikliyi çətin haldı. Yeni baş məşqçi gələndən sonra çətin perioddan çıxdıq. “Turan Tovuz”u udduq, “Səbail”i udduq, bu dəfə də heç-heçə etdik. Çətin durumdan çıxmaq üçün əlimizdən gələni edəcəyik.

- Vasili Berezutski özüylə nə yeniliklər gətirdi?
- Karyerasına baxsaz, çox zəngin təcrübəsi olduğunu görərsiz. Futbolçuları daha yaxşı görür, anlayır və hiss edir. Özünün yüksək səviyyədə futbolçu karyerası olub. Özü də bilir və bizə deyir ki, nəyi necə edərək indiki durumdan çıxa bilərik. Həqiqətən çox təcrübəli məşqçidi.

- Yeni baş məşqçi gələndən sonra səni meydanda görmürük. Bu, nə ilə bağlıdı?
- Millidə zədə almışdım. Baldır nahiyəmdə dartınma vardı. Yavaş-yavaş düzəlir. Hər şey qaydasındadı. Heç bir narahatlığa əsas yoxdu.

- Murad Musayev gedərkən demişdi ki, komandada artıq yenilik lazımdı. Bəs Renduliç gedərkən nə dedi?
- Dedi ki, sizin keyfiyyətiniz var, ruhdan düşməyin, inanıram ki, yüksək yerlərdə olacaqsız.

RÖYANƏ OĞUZ