"Səbail" Misli premyer-liqasının səfərdə baş tutan 15-ci tur matçında "Sabah"ın meydanından məğlub ayrıldı - 0:1.

"Football-plus.az" xəbər verir ki, "dənizçilər"in baş məşqçisi Cavid Hüseynov oyunsonrası mətbuat konfransında jurnalistlərin suallarını cavabladı.

- "Sabah"ı qələbə münasibətilə təbrik edirəm. Çətin olacağını bilirdik. Ona görə ki, heyətlə bağlı problemlər var. Hücumlar zamanı əziyyət çəkirik. Çox "dişsizik". Qışa qədər səbirli olmalıyıq. Növbəti matçda xal və ya xallar qazanmağa çalışacağıq.

- Rəhbərlikdən transferlə bağlı söz verilibmi?
- Bizə hücumçu lazımdı. Bu yöndə iş gedir. Bəzi oyunçuları bəyənmişik. Amma dəqiq nəsə yoxdu deyə, açıqlama verə bilmərəm. Danışıqlar davam edir.

- Bir-iki futbolçu transfer edəcəksiz, yoxsa daha çox?
- Düzü, planımız daha çoxunu etməkdi. Xeyli zədəlimiz var. Madi Queta və Gitay Sofir cəmi dörd gün komandayla birgə məşq edib. Mən gələndə yeddi futbolçu zədəli idi. Ayman Bouali birhəftəliyə sıradan çıxıb. Ümumiyyətlə, heyətlə bağlı durum ürəkaçan deyil.

- Bu qədər zədəlinin olması nə ilə bağlıdı?
- Məndən əvvəl yaranan problemlərdi. Məncə, bu haqda danışmaq doğru olmaz.

KƏNAN BAHADIR