Bilindiyi kimi, Amil Yunanov Albaniyaya dönüb.

Sentyabrda “Bülis”ə transfer olan Yunanov cəmi ayyarım sonra klubun düşərgəsini tərk edərək Bakıya qayıtmışdı. Təbii ki, istənilən futbolçu klubdan ayrılmaq istəyinə düşərsə, ən azı üç ay gözləməlidi. İndiki halda Yunanovun hərəkəti, sadəcə, özbaşınalıq kimi görünür.

Düşünmək olardı ki, Amil “Bülis”ə dönəndən sonra yaşıl meydana çıxmaq imkanı da qazanacaq. Ancaq belə olmayıb. Noyabrın 29-da “Vlajniya”nı qəbul edən “Bülis” 1:0 hesabıyla qələbə qazanıb. Amil isə nə start heyətində yer alıb, nə də sonradan oyuna qoşulub. Onun adı heç protokola da salınmayıb. Belə münasibiət o anlama gəlir ki, Albaniya klubu ilə azərbaycanlı futbolçu arasındakı münasibətlər tam pozulub.

Amillə əlaqə saxlamağa, son yaşananlarla bağlı məlumat almağa çalışsaq da, cəhdlərimiz fayda vermədi. Görünür, futbolçu bir müddət susmağı münasib bilir. Təki sonu xeyir olsun.

RÖYANƏ OĞUZ