Bu gün premyer-liqada 15-ci turun açılış oyununda, Bakı vaxtı ilə saat 16.30-da ''Everton'' ''Liverpul''u qəbul etməli idi. Amma böyük maraqla gözlənilən Mersisayd derbisi əlverişsiz hava şəraiti üzündən təxirə salınıb.

Bu fakt hər iki klubun sosial şəbəkələrində təsdiq olunub.

Britaniyada dünəndən başlayan ''Darraq'' qasırğası güclü külək və yağışla müşaiyət olunur. Metereoloqlar insanlara küçələrə mümkün qədər az çıxmağı tövsiyə ediblər. Ağacların aşması və müxtəlif qırıntıların havaya qalxması üzündən küçəyə çıxmaq təhlükəlidi. Oyunun başlamasına bir neçə saat qalmış vəziyyət düzəlmədiyindən derbi təxirə salınıb. Bu, ''Qudison Park''dakı son derbi olmalı idi. Gələn mövsümdən etibarən ''Everton'' 52 min tutuma malik yeni stadionda oynayacaq. Matçın nə vaxt keçiriləcəyi barədə məlumat yoxdu.

Qeyd edək ki, əlverişsiz hava üzündən Uelsdə də bütün oyunlar, eləcə də çempionşipdə ''Kardiff Siti'' - ''Uotford'', ''Plimut'' - ''Oksford Yunayted'' matçları da təxirə salınıb.

ƏLİ