İspaniya La Liqada noyabrın ən yaxşı futbolçusu ilə məşqçisi müəyyənləşib. İki nominasiyada müxtəlif klubların üzvləri mükafata layiq görülüblər.

Eyniadlı qurumun mətbuat xidmətinin məlumatına görə, ötən ayın ən yaxşı oyunçusu Vinisius Junior seçilib. “Real”ın vingeri noyabrda La Liqada 2 oyuna çıxaraq 3 qol vurub və 1 məhsuldar ötürmə verib. 24 yaşlı braziliyalı bu mövsüm “Real”ın heyətində bütün turnirlərdə 18 oyuna çıxaraq 12 qol vurub və 8 qolun ötürməsini verib.

La Liqada “ayın ən yaxşı məşqçisi” nominasiyasında Miçel Sançes qalib gəlib. “Jirona”nın çalışdırıcısı Dieqo Simeone (Atletiko) ilə İmanol Alquasili (Real Sosyedad) qabaqlayıb. “Jirona” ötən ay La Liqada 3 oyun keçirib və maksimum nəticə göstərib: “Leqanes”ə 4:3, “Xetafe”yə 1:0, “Espanyol”a 4:1 hesabı ilə qalib gəlib. Miçelin komandası hazırda turnir cədvəlində 15 oyuna 22 xalla 7-ci yeri tutur.