"Əvvəlcə qeyd edim ki, 7-8 ildi Rusiya superliqasında oynayıram. Hazırda da "Krosnadar"ın üzvüyəm. Ona görə də Rusiya qadın futboluna çox yaxşı bələdəm. Burda olan inkişaf gözümün qarşısında baş verib. Rusiya futbolunun müəyyən sanksiyalara mərus qalmasına baxmayaraq, çempionatları yüksək səviyyədədi. İstər qadın, istərsə də kişi futboluna yanaşma- hər şey yüksək səviyyədədi. Çempionatları heç də Avropa futbolundan geri qalmır. Milli koamndası isə faktiki çox böyük oyunçu kütləsinə sahibdi. Həm də keyfiyyətli futbolçulardan qurulub. Məsələnin digər tərəfi odu ki, biz bir çox şeyə sahib deyilik. Bununla belə, Rusiya ilə başabaş mübarizə aparırdıq. Onlar fikirləşir ki, üstün tərəf olublar. Amma hər iki oyuna baxsaz, futboldan anlayışı olan insan özü də görər ki, hər iki oyunda üstün tərəf kim idi. Təbii ki, biz. Amma qol vəziyyətləri baxımından Rusiya üstün idi. Mən öz komandama təşəkkür edirəm ki, həqiqətən Rusiya kimi güclü milliyə qarşı çəkinmədən mübarizə əzmimizi ortaya qoydu. Hər iki oyunda minimimal hesablı məğlubiyyət aldıq. Birinci görüşdə öz səhvimizdən qol buraxdıq. İkincidə də eyni səhv oldu. İkinci oyunda hətta bir fərqli məqam oldu. Küncdən zərbə zamanı mənə qarşı qayda pozulmuşdu və 90, bəlkə də 100 faizlik penalti epizodu idi. Çünki mən topa istiqamət götürmüşdüm, arxadan ayaqlarıma zərbə vurdular. Eşitdiyim qədəri ilə özləri də narahat olmuşdular ki, bu penaltidi. Həmin epizodu incələmək lazımdı. Hərəkət hakimin gözündən qaçdı. Bəlkə də oyun 1:1 bitə bilərdi. Bunlar, yoldaşlıq oyunu idi. Hər iki komanda istədiyi oyunçulara şans verir, yoxlayır. Rusiya kimi rəqiblə oyunlarda bir daha gücümüzü sınadıq. Məşqçi heyətimiz də göstərilən oyundan razı qaldı. Əsas odu ki, bu hesablar rəsmi oyunlarda olmasın. Rəsmi görüşlərdə ən yaxşısını etməyə çalışacağıq ki, qrupdan birinci çıxaq, B liqasına yüksələk. Ötən il biz bunu bacarmış və C liqasında bir məğlubiyyət belə almadan B liqasına yüksəlmişdik. Qrupdan pley-offa yüksəldik, rəqibimiz Portuqaliya oldu. Çox insanlar bizi Portuqaliyaya uduzduğumuz oyunlara görə qınadı. Amma onlar Çexiyanı udub Avropa çempionatına vəsiqə qazandı. Yəni rəqibimiz belə komanda idi. Həmişə çalışırıq ki, ölkəmizin adını hər zaman yüksəklərdə saxlayaq, bunu üçün əlimizdən gələni edək. Düşünürəm ki, gələcək oyunlarda bizi sevən azarkeşlərimizi sevindirə biləcəyik. O gücə sahibik. Rəqiblərimiz Monteneqro və Litvadı. C liqasında çətin oldu, üçlü qrupa düşmüşük. O komandalar arasında düşə biləcəyimiz ən çətin rəqiblərdən Monteneqro idi ki, yenə bəxtimizdən onlarla düşdük. Oyunçuları var ki şəxsən tanıyıram. Almaniya, Macarıstan, Rusiya, Türkiyə klublarında oynayırlar. Buna baxmayaraq, oyuna yaxşı hazırlaşacağıq. Çox istərdim ki, Azərbaycan futbolu inkişaf etsin. Bunun üçün hamılıqla əlimizdən gələni edirik”.