Cənubi Amerikanın ən nüfuzlu klub turniri sayılan Libertadores Kubokuna yekun vuruldu.

Buenos-Ayresdə yerləşən və ''River Pleyt''in ev oyunlarını keçirdiyi ''Monumental'' stadionunda Braziliyanın iki təmsilçisi - ''Atletiko Mineyro'' ilə ''Botafoqo'' üz-üzə gəldi.

Braziliya çempionatında lider olan və sona 2 tur qalmış ən yaxın rəqibini 3 xal qabaqlayan ''Botafoqo'' matçın favoriti hesab olunurdu. Amma oyun Rio de Janeyro təmsilçisi üçün faciəvi başladı. Artıq 2-ci dəqiqədə Qreqore rəqibin başına zərbə endirdiyi üçün tarixi bir qırmızı vərəqə aldı. Ona görə də ''Botafoqo'' demək olar, bütün oyunu azlıqda keçirməli oldu. Amma Artur Jorjenin komandası daha istəkli oynamaqla bir nəfər azlıqda qalmağı kompensasiya etdi. Luis Enrike 35-ci dəqiqədə ''Botafoqo''nu hesabda önə keçirdisə, fasilə ərəfəsində ''Qalatasaray'' və ''Mançester Yunayted''in sabiq üzvü Aleks Telles penaltidən fərqi artırdı.

Varqas ikinci hissənin əvvəllərində qollardan birinin əvəzini çıxsa da, bu futbolçu oyunun sonlarına yaxın iki gözəl fürsəti boşa verməklə diqqət çəkdi. Əsas vaxta əlavə olunmuş 7-ci dəqiqədə isə Santos yekun nəticəni müəyyənləşdirdi. Beləliklə, ''Botafoqo'' 3:1-lik qələbə ilə tarixində ilk dəfə Libertadores Kubokunun qalibi oldu. Bu turnir ardıcıl 6-cı dəfə Braziliya təmsilçisinin qələbəsi ilə yekunlaşdı. ''Botafoqo'' həm də gələn ilin yayında ABŞ-da keçiriləcək Klublararası Dünya Çempionatında iştirak etməyə haqq qazandı.

ƏLİ