Oktyabrın 29-30-da Libertadores Kubokunun (LK) pley-offunda sonuncudan əvvəlki mərhələyə yekun vuruldu. Cənubi Amerikanın ən nüfuzlu klub turnirində yarımfinalın cavab oyunları keçirildi.
[/b]
Bu mərhələdə Braziliyanın 2, Argentina və Uruqvayın hərəyə 1 klubu çıxış edirdi. İlk oyunlar diqqəti braziliyalıların inamlı qələbələri ilə cəlb etmişdi. Regionun ən böyük ölkəsinin təmsilçiləri rəqiblərini evdə böyük hesabla məğlubiyyətə uğratmışdılar. “River Pleyt”i 3 cavabsız qolla məğlub edən “Atletiko Mineyro” Buenos Ayresdə qolsuz heç-heçəyə nail olmaqla azarkeşlərini sevindirdi. Argentinalı Qabriel Militonun çalışdırdığı braziliyalılar finalın ilk iştiraçısı oldular.

“Botafoqo”un da yarımfinalı adlamaq şansı yüksək idi. Hazırda Braziliya çempionatında liderlik edən rio de janeyrolular evdə rəqibinə daha böyük hesabla qalib gəlmişdilər – 5:0. “Penyarol” Uruqvayda darmadağının əvəzini çıxa bilmədi. Montevideolular yalnız 3:1 hesablı qələbə ilə təskinlik tapdılar. Beləliklə, LK-nın finalı Braziliya klublarının iştirakı ilə keçəcək. Həlledici matç noyabrın 30-da Buenos Ayresdə təşkil ediləcək.

[b]yarımfinal, cavab oyunları
River Pleyt (Argentina) - Atletiko Mineyro (Braziliya) - 0:0 (ilk oyun - 0:3)
Penyarol (Uruqvay) - Botafoqo (Rio de Janeyro, Braziliya) 3:1 (0:5)
Baes, 31; 66. Batista, 89 - Almada, 88.
Bombardirlər: Junior Santos (Botafoqo RJ) - 9, Paulinyo (Atletiko Mineyro) – 7, Silvera (Penyarol), Borxa (River Pleyt) – 6.