“Gənc oyunçulara layiq olduqları şansı verməyə çalışıram. Mən oyunçuya şans verərkən adına və ya yaşına yox, səviyyəsinə baxıram. Ona görə də bu mövsüm, demək olar, əlimin altındakı bütün futbolçular az-çox oynamaq fürsəti əldə edib. 6 aya yaxındı burdayam. Burda U-15-dən tutmuş U-19-a qədər hamısında istedadlı isimlər var. Futbolçu kimi Türkiyədən ayrılmağımın üzərindən 12 il ötüb. Bu müddət ərzində büdcə baxımından “Qalatasaray” və “Fənərbaxça” ilə Anadolu klubları arasında fərqin böyüdüyünü söyləyə bilərəm. Buna baxmayaraq, Anadolu klublarında da səviyyəli futbolçular az deyil. Hakimlik mövzusu təkcə Türkiyədə yox, hər yerdə müzakirə olunur. Braziliyada da, İtaliyada da... Hakim səhvi hər yerdə var. Çünki insanın olduğu yerdə səhv də olur. Hakimləri dəyişmək əvəzinə onları inkişaf etdirmək lazımdı. Mən hansısa hakimin bilərəkdən nəsə etdiyinə, hansısa kluba qarşı sövdələşmənin olduğuna inanmıram. Hərənin bir fikri var. Bu cür düşünən insanları anlayışla qarşılayıram. Amma mənim düşüncəmə görə, hakim meydana çıxıb əlindən gələni edir və sonra da evinə dönür. Mourinyoya məni “Fənər”in sonrakı baş məşqçisi kimi görməsi ilə bağlı dediyi sözlərə görə minnətdaram. Fərqli ölkələrdə çempionluqlar qazanmış böyük bir futbol adamıdı. İndi də “Fənərbaxça”ya xidmət edir. Gözəl düşüncələri üçün təşəkkür edirəm. Okan Buruku və “Qalatasaray”dakı uğurlarını izləyirəm. Yalnız bu klubda yox, daha öncə çalışdığı yerlərdə də onu təqib edirdim. Əlinin altında güclü oyunçular var və komanda da yaxşı formadadı. Ardıcıl iki mövsüm çempion olmaq asan məsələ deyil. Ötən mövsüm “Fənərbaxça” ilə başabaş getdilər və son turda çempionluğu rəsmiləşdirdilər. Burukun yaxşı keçmişi, “Qalatasaray”ın da yaxşı tarixi var. Bütün ölkə onların uğurlarını dəstəkləyir. Qabriel Saranı uşaq yaşlarından tanıyıram. Onu sonradan tanıyanlar üçün performansı sürpriz ola bilər. Amma biz onun adı “Qalatasaray”la hallanmağa başladığı vaxtdan bəri burda uğur qazanacağını bilirdik. Zikodan sonra nə üçün hələ də Türkiyədə əcnəbi məşqçi çempion ola bilməyib? Əslində Zikro bizim dönəmdə hər baxımdan oturuşmuş bir komandanın parçası idi. Çempionluğa inanan, səviyyəsini hər matçda göstərməyə çalışan bir oyunçu qrupu, eləcə də çempionluq üçün hər şey etməyə hazır olan rəhbərlik və prezidentimiz var idi. Bir-biri ilə zəncirvari şəkildə bağlı olan bu məqamların hamısı bir araya gəldiyi üçün çempion olmuşduq. Çempion olmaq heç də asan məsələ deyil. Hər müstəvidə bir araya gəlib bunun üçün zəmin hazırlamaq lazımdı. Mənim üçün məşqçinin milliyyəti heç vaxt önəmli olmayıb”.

“Təəssüf ki, sözlərim düzgün tərcümə olunmayıb. Ona görə də bu mövzuya yenidən qayıtmalı oldum. Öz dilimdə söylədiklərim kameraya düşüb. Ona görə də işim rahatdı. Okan Burukun tək “Qalatasaray”da yox, digər klublardakı uğurları da bütün Türkiyəyə məlumdu. Ziko və “Fənərbaxça” ilə bağlı söylədiyim kimi, Okan Buruk da “Qalatasaray”da yaxşı çalışan sistemin bir parçasıdı. Yaxşı və qüvvətli oyunçuları var. “Qalatasaray” ölkədəki digər klubların yaxalamağa çalışdığı bir kollektivdi. Buruk artıq neçə müddətdi yaxşı işlər görür. Sözlərimin düzgün tərcüməsi məhz bu cürdü. Üzgünəm, amma bu, məndən asılı olmayan bir şeydi”.