İtaliya çempionatının 4-cü divizion klubunda maraqlı hadisə baş verib.

D seriyasında keçirdiyi son altı oyunun heç birində qələbə qazana bilməyən “Pyaçentsa” noyabrın 19-u, səhər saatlarında təkcə idman direktoru Alesio Sestanın yox, baş məşqçi Karmin Parlatonun da istefaya göndərildiyini elan etdi. İkincinin yerinə gələn Simone Bentivolyo isə yeni vəzifəsində heç bir gün də davam gətirmədi. İş ondadı ki, tifozi “Pyaçentsa”nın yeni baş məşqçisini qəbul etmədi. Onlar Bentivolyonun rəhbərliyi altında keçirilən ilk məşqdəcə bildirdilər ki, o qovulmasa, sevimli komandalarının oyunlarını boykot edəcəklər.

Azarkeşlərin italiyalı mütəxəssisə neqativ münasibətinin səbəbini 2011-ci ildə yaşanan danışılmış oyunlarla bağlı qalmaqalda axtarmaq lazımdı. Onda günahını boynuna alan Siomen 13 aylıq cəzalanmışdı. Həmin vaxt o, “Bari”nin şərəfini qoruyurdu.

Azarkeşlərin mövqeyini nəzərə alan klub rəhbərliyi yeni çalışdırıcını elə ilk iş günündə qovdu. Onun yerinə isə “Pyaçentsa”dan ayyarım əvvəl – oktyabrın 7-də ayrılan Stefano Rossini gətirildi. Klubun mətbuat xidmətinin məlumatı:

“Pyaçentsa” 12 turdan sonra 14 xalla D seriyasının D qrupunda 11-ci pillədə qərarlaşıb. Eyniadlı şəhəri təmsil edən komanda üç qələbə qazanıb, 4 oyunda uduzub, 5 dəfə heç-heçə edib. “Qırmızı-ağlar”ın qızıl erası 1990-cı illərin sonun – 2000-ci illərin əvvəlində, yəni komanda İtaliya futbolunun elitasında mübarizə aparanda yaşanıb. Onların A seriyasındakı ən yaxşı nəticəsi 1997/98 və 2001/02 mövsümlərinə təsadüf edib – 12-ci yer. “Pyaçentsa” A seriyasında sonuncu dəfə 2003-cü ildə görünüb.

Adı çəkilən komanda noyabrın 20-də Rossininin dönüşündən sonra ilk oyuna çıxıb. “Canavarlar” “Villa Valle”ni 2:1 hesabıyla məğlub edərək D seriyasının İtaliya kubokunda 1/8 finala vəsiqə qazanıb. Rossininin növbəti hədəfi çempionatdakı məğlubiyyət seriyasına son qoymaqdı. “Qırmızı-ağlar” bazar günü “İmoleze” ilə qarşılaşacaq.