2022-ci ilin fevralından bəri Ukrayna ərazisini işğal etmək üçün dağıdıcı müharibəyə başlayan Rusiyanın futbol yığması DÇ-2022 və AÇ-2024-ün ardından daha bir böyük turnirdən kənarda qalacaq.

UEFA noyabrın 11-də bu quruma üzv olan milli federasiyaların prezidentlərinə və baş katiblərinə göndərdiyi sirkulyar məktubda DC-2026-nın seçmə mərhələsinin püşkatması ilə bağlı bütün əsas məqamları çatdırıb. Xatırladaq ki, dekabrın 13-də Sürixdə keçiriləcək püşkatma mərasimi Mərkəzi Avropa vaxtı ilə 12.00-da (Bakıda 15.00) başlayacaq.

Sirkulyar məktubda hər birində 4 və ya 5 yığmanın yer alacağı 12 qrupun yaradılacağı, seçmə mərhələnin 192 oyundan ibarət olacağı yazılıb. Bu o deməkdi ki, UEFA 5 komandalı 6 və 4 komandalı 6 qrup yaradacaq.

Fələstinlə silahlı münaqişəni davam etdirən İsrail də püşkatma mərasiminə buraxılacaq. Heç bir seçmə qrupda ikidən artıq “qış ölkəsi” (Belarus, Estoniya, Farer adaları, Finlandiya, İslandiya, Latviya, Litva, Norveç, Ukrayna) ola bilməz. Bir qrup ölkə də var ki, onlarda vaxt Mərkəzi Avropadakından fərqlənir, həmin ölkələrdə oyunların başlama vaxtı tənzimlənir. Bunlar Ermənistan, Azərbaycan, Gürcüstan, Qazaxıstan, Belarus və Türkiyədi.

Artıq Azərbaycan yığmasının DÇ-2026-nın Avropa zonası üzrə seçmə mərhələsinin püşkatma mərasimində yer alacağı səbət də dəqiqləşib. Santuşun rəhbərlik etdiyi komanda 4-cü səbətdə olacaq. Bu isə o deməkdi ki, 5 komandalı qrupa düşəcəyimiz təqdirdə aşkar zəiflərdən Moldova, Malta, Andorra, Cəbəllütariq, Lixtenşteyn və San Marinodan biri bizə rəqib ola bilər.

1-ci səbət: İspaniya, Almaniya, Portuqaliya, Fransa, İtaliya, Niderland, Danimarka, Xorvatiya, İngiltərə, Belçika, İsveçrə, Avstriya.

2-ci səbət: Türkiyə, Ukrayna, İsveç, Uels, Macarıstan, Serbiya, Polşa, Yunanıstan, Rumıniya, Slovakiya, Çexiya, Norveç.

3-cü səbət: Şotlandiya, Sloveniya, İrlandiya, Albaniya, Şimali Makedoniya, Gürcüstan, Finlandiya, Şimali İrlandiya, Monteneqro, Bosniya və Hersoqovina, İsrail.

4-cü səbət: Bolqarıstan, Lüksemburq, Kosovo, Belarus, Ermənistan, Qazaxıstan, Azərbaycan, Estoniya, Cənubi Kipr, Farer adaları, Latviya, Litva.

5-ci səbət: Moldova, Malta, Andorra, Cəbəllütariq, Lixtenşteyn, San Marino.

Seçmə mərhələnin oyunları gələn ilin martında start götürəcək. 12 qrupun qalibləri birbaşa DÇ-2026-nın final mərhələsinə vəsiqə qazanacaq. 2-ci yeri tutan komandaları isə pley-offda DÇ-yə vəsiqə uğrunda mübarizəni davam etdirəcək.

Xatırladaq ki, final mərhələsinə Avropadan 16 yığma qatılacaq, ümumiyyətlə, turnirdə ilk dəfə 48 yığma iştirak edəcək. DÇ 2026-cı ilin 11 iyun – 19 iyul aralığında ABŞ, Meksika və Kanadada keçiriləcək.