Vaxtilə 39 oyunda İrlandiya yığmasının şərəfini qorumuş Li Karsli İngiltərə yığmanın baş məşqçisi kimi qısa karyerasına Dublində İrlandiya üzərində qazanılan qələbə (2:0) ilə başlamışdı. İndi isə bu komanda ilə növbəti oyun Tomas Tuxelin hansı irsə yiyələnəcəyinə aydınlıq gətirməliydi.

Fasiləyə qədər meydan sahiblərinin işi heç də asan olmadı. Hətta ilk yarının uzatma dəqiqələrində cərimə meydançasına qədər dönən Keyn Molumbiyə qarşı kobudluğa görə sarı vərəqə də aldı. Amma İrlandiya yığmasını Skeyls “dəfn etdi”. “Seltik”in müdafiəçisi 2-ci hissənin əvvəlində Bellingemi cərimə meydançasında yerə sərməklə təkcə penaltiyə səbəbkar olmadı, həm də meydandan qovuldu. Keyn ardıcıl 27-ci penaltini qola çevirdi, həm də bunu tam vaxtında etdi. Çünki paralel keçən oyunda Yunanıstan da Finlandiyanın qapısına yol tapdı. Qrupun liderləri bundan sonra da paralel şəkildə hərəkət etdi. Qordon fərqi artırdığı anda topu qapıçının başı üzərindən atan Tzolis də gözəl qol vurdu.

Beləcə “üç şir” finişdə əsas rəqibini qabaqlaya bildi. Daha dəqiqi, şəxsi oyunlardakı top fərqi İngiltərəni Millətlər Liqasının elit divizionuna qaytardı. Keyn isə yığmada oyun sayına (69) görə əfsanəvi Herd Müllerlə irlandiyalıların əfsanəsi Robbi Kini arxada qoydu. Bu oyunda sonuncu qolu vuran Hervud-Bellis gənclər yığmasında da Karslinin sərəncamında olub. 50 yaşlı mütəxəssis yığmanı Tuxelə nümunəvi şəkildə təhvil verir.
Bu qrupda keçirdiyi bütün oyunlarda uduzan Finlandiya yola artıq C liqasında davam edəcək. İrlandiya yığması isə gələn ilin martında pley-offda gücünü sınayacaq.

B liqası, 2-ci qrup
6-cı tur
İngiltərə - İrlandiya 5:0 (0:0)
İngiltərə: Pikford, Holl, Qexi, Uoker (Hervud-Bellis, 62), Cons (Qomeş, 79), Qallaher (Rocers, 75), Qordon (Bouen, 75), Bellingem, Madueke (Solanke, 75), Keyn.
İrlandiya: Kelleher, O”Dauda (Eyzas, 66), Skeyls, Kollinz, Makqiness, D.O”Şi, Molumbi, Kallen (Moran, 76), Ebosele (Menninq, 66), Ferqyuson (Perrott, 66), Şmodiks (Makatir, 86).
Qollar: Keyn, 53-p. (1:0). Qordon, 56 (2:0). Qallaher, 58 (3:0). Bouen, 76 (4:0). Hervud-Bellis, 79 (5:0).
Vərəqələr: Bellingem, 42. Madueke, 42. Skeyls, 43. Keyn, 45+3. Molumbi, 45+3. D.O”Şi, 85. Qomeş, 89 – sarı. Skeyls, 51 – qırmızı (ikinci sarı).
Hakim: Erik Lambrexts (Belçika).
17 noyabr. London. 79969 tamaşaçı.

Finlandiya – Yunanıstan 0:2 (0:0)
Finlandiya: Yoronen, Hokans (Pukki, 75), Pikkoraynen (Ollila, 67), İvanov, Hoskonen, Alho (Niskanen, 82), Kamara (Nissilya, 75), Kayrinen, Lod, Pohyanpalo (Antman, 67), Kelman.
Yunanıstan: Vlahodimos, Simikas, Kulierakis, Mavropanos, Rota, Mantalos (Retsos, 88), Kurbelis (Muzakitis, 90+1), Tzolis (Yannulis, 88), Bakasetas (Siopis, 74), Masuras (Pelkas, 74), Pavlidis.
Qollar: Bakasetas, 52 (0:1). Tzolis, 57 (0:2).
Vərəqələr: Pikkaraynen, 4. Alho, 10. İvanov, 60 – sarı.
Hakim: Villi Delajo (Fransa).
17 noyabr. Helsinki. 17661 tamaşaçı.

1. İngiltərə 6 5 0 1 16-3 15
2. Yunanıstan 6 5 0 1 11-4 15
3. İrlandiya 6 2 0 4 3-12 6
4. Finlandiya 6 0 0 6 2-13 0

Oyundan sonra
Li Karsli, İngiltərə yığmasının baş məşqçi əvəzi:[quote] [quote]“Oyuna çox yaxşı başladıq. Möhkəm, yaxşı təşkil olunmuş komandaya qarşı oynadıq, rəqibin müqavimətini qırmaq çətin idi. İrlandiyanın əks-hücumlarda və standart vəziyyətlərdə təhlükəli olacağını bilirdik. Hansısa məqamda qol vəziyyətləri yaxalayacağımıza inanırdım, odu ki, sadəcə, səbirli davranmaq lazım idi”.[/quote]

Heymir Hadlqrimsson, İrlandiya yığmasının baş məşqçisi: [quote]“0:5 uduzandan sonra özünə bəraət qazandırmağa dəyməz. Odu ki, ilk yarını fantastik keçirdiyimizi deməyəcəm. Ancaq komandanın necə inkişaf etdiyinə də baxmaq lazımdı. Düşünürəm ki, bu oyundan hansısa nəticələr çıxara bilərik”.
Harri Keyn, İngiltərə yığmasının hücumçusu: “Bizim üçün həqiqətən də vacib qələbədi. Yaxşı toplanış keçdik. İki çətin oyunu arxada qoyduq. Yunanıstanla səfər oyununda əsas vəzifənin öhdəsindən gəlmişdik. Bu gün ilk yarı bizim üçün çətin keçsə də, ikinciyə böyük enerji ilə çıxdıq. Başladığımız işi sona çatdıra bildik”.[/quote]