Dekabrın 1-də 15-ci tur çərçivəsində Azərbaycan derbisi keçiriləcək. Təbii ki, “Neftçi”nin “Qarabağ”ı qəbul edəcəyi oyun maraqla gözlənilir.

Xatırlayırsızsa, 7-ci turda “köhlən atlar” “ağ-qaralar”ı qəbul etdi və böyükhesablı (4:0) qələbə qazandı. İndi paytaxt təmsilçisi əzəli rəqibdən qisas almağa, ağdamlılar isə liderliyi qorumağa çalışacaq.

Samir Abasovun komandası meydana itkilərlə çıxacaq. Bu barədə “Football-plus.az”a “Neftçi”nin mətbuat xidmətinin rəhbəri Asəf Zeynallı məlumat verib. Onun sözlərinə görə, Emin Mahmudov və Azər Salahlı zədəlidi. Eminin bu həftə fərdi, gələn həftədən isə komandayla birgə məşqlərə başlayacağı gözlənilir. Beləliklə, hər iki futbolçu “Qarabağ”a qarşı oynamayacaq.

Qeyd edək ki, Azərbaycan derbisi saat 19.00-da başlayacaq.

KƏNAN BAHADIR