Türkiyənin 1-ci liqa təmsilçisi ''Amed Sportif Fəaliyyətlər''in çətin günləri davam edir.

Diyarbəkir təmsilçisi bu mövsüm qarşısına elitaya yüksəlmək hədəfi qoymuş və bunun üçün ölkənin ən tanınmış mütəxəssislərindən olan Ərsun Yanalı baş məşqçi postuna gətirmişdi. Amma işlər istənilən şəkildə getmədi. Uğursuz nəticələr üzündən ötən həftə hətta fanatlar bazanın qarşısına gələrək məşqdən sonra Yanal ilə haqq-hesab ''çürütməyə'' başlamışdılar.

Bazar günü evdə ''Pendikspor'' ilə oyunda qeydə alınan minimal hesablı məğlubiyyət bardağı daşıran son damla oldu. Bazar ertəsi rəhbərlik tam tərkibdə istefa verdi. Başqan Əziz Elaldi noyabrın 12-də növbədənkənar seçkilərin olacağını bildirdi. Adətən belə durumlarda baş məşqçi də yeni rəhbərliyi önünü açmaq üçün istefa verir. ''Amed SF''da da belə oldu. Ərsun Yanal bu gün istefa verdiyini açıqladı. Komanda hazırda 10 tura topladığı 13 xalla 15-ci pillədə qərarlaşıb.

Bəzi mənbələrin iddiasına görə, Yanal artıq Türkiyədə məşqçi kimi fəaliyyət göstərməyəcək. 61 yaşlı mütəxəssis qızının təhsili üçün ABŞ-a yollanaraq orda yaşayacaq. Fürsət yaransa o elə orda da məşqçi kimi çalışacaq. Xatırladaq ki, Yanal hələ də ''Fənərbaxça''nı çempion (2014) etmiş son məşqçi statusundadı.

ƏLİ