Türkiyənin tanınmış və təcrübəli mütəxəssislərindən biri olan Ərsun Yanalın ''Amed Sportif Fəaliyyətlər''də işləri yaxşı getmir.

Diyarbəkir təmsilçisi yayda Yanal ilə anlaşmış və bu məşqçinin qarşısına klubu elitaya daşımaq hədəfi qoyulmuşdu. Amma ''Amed SF'' geridə qalan 9 turda 3 qələbə, 4 heç-heçə, 2 məğlubiyyətlə 13 xal toplayıb və yalnız 12-ci pillədə qərarlaşıb. Fanatlar təbii ki, bu durumdan narazıdı. Dünənki axşam məşqinin ardından isə azarkeşlərlə 62 yaşlı Yanal arasında gərginlik yaşandı. Bir qrup azarkeş bazanın önünə gələrək məşqin bitməsini və Yanalın çıxmasını gözlədilər. Daha sonra fanatların içində ən aqressiv olanı məşqçiyə etirazını bildirməyə başladı. Onlar arasındakı dialoq sosial şəbəkələrdə də çox paylaşıldı.

Azarkeş ''mən bu komanda üçün məmurluğumu verdim, sən isə burda pul qazanırsan'' dedi. Yanal da ona ''mən də verdim, danışma'' cavabını verdi. Daha sonra olaya ''Amed SF''nin yönəticisi Faysal Tosun müdaxilə etdi və azarkeşləri sakitləşdirməyə çalışdı.

Xatırladaq ki, ''Fənərbaxça''nı çempion edən son məşqçi 2013/14-də məhz Yanal olub.

ƏLİ