“Rəqiblərin çətin vəziyyətə düşəndə işimizə kölgə salmaq istəməsi hamımızı təəccübləndirir” – Santos “Qarabağ”ı gözləyir
Elmar Baxşıyevin çalışdırdığı “Araz-Naxçıvan” uğurlu qrafik cızır.
Muxtar Respublika təmsilçisi 9 oyunluq məğlubiyyətsizlik seriyasına malikdi. Üstəlik 3-cü pillədə qərarlaşan komanda bir oyun az keçirib. Naxçıvanlıların uğurlarında böyük rola malik futbolçulardan biri isə Felipe Santosdu. Braziliyalı yarımmüdafiəçi 5 qolla bombardirlər siyahısında üçüncüdü. Yeri gəlmişkən, “qırmızı-ağlar” cari mövsümdə yalnız “Qarabağ”a uduzub.
“Football-plus.az” Santosla yuxarıda yazılanlar ətrafında söhbətləşdi:
“Qarabağ” çox güclüdü. Xeyli keyfiyyətli futbolçusu var. Bildiyimə görə, həmin oyunçular dörd ildən artıqdı bir yerdə oynayır, bir-birini çox yaxşı tanıyır. Komanda hər il avrokuboklarda çıxış edir. Bu üzdən getdikcə daha güclü olur. Düzdü, ilk dövrədə “Qarabağ”a uduzduq. Amma yenə üz-üzə gələcəyik”.
Braziliyalı 11-ci turun “Zirə” ilə qarşılaşmasından da bəhs etd:
“Fikrimcə, rəqibdən daha yaxşı oynadıq. “Zirə” oyun ərzində heç nə edə bilmədi. Sadəcə, uğursuzluğumuza görə qol buraxdıq. Biz isə saysız-hesabsız təhlükəsiz vəziyyət yaratsaq da, cəmi bir qol vurduq. Həmin oyunda qalib gələ bilərdik”.
Santosun fikrincə, bəzilərinin “Araz-Naxçıvan”ın hakim köməyi sayəsində yuxarı pillələrdə qərarlaşdığını düşünməsi böyük haqsızlıqdı:
“Hakim simpatiyasından söhbət gedə bilməz. Çünki komandamızın sərgilədiyi oyun, hər matçda qələbə uğrunda mübarizə aparması göz önündədi. Rəqiblərin çətin vəziyyətə düşəndə işimizə kölgə salmaq istəməsi hamımızı təəccübləndirir. Kollektivimizdə keçmişdə çempion olan, başqa komandaların üzvlərindən fərqlənən bacarıqlı futbolçular var. Nəticələrin sürpriz olduğunu düşünmürəm. Bu yerə gələ bilmək üçün nə qədər çox çalışdığımızı yalnız biz bilirik”.
Santos bombardirlər siyahısında olmasını və liderliyə yüksəlmək şansını belə şərh etdi:
“Bu, çox çətin olacaq. Siyahıdakı futbolçular çox keyfiyyətli və istəkli görünür. Lider olmaq istəyirəm. Təbii ki, təkcə özümə görə yox, həm də komandama kömək etmək üçün. Çalışacam ki, mövqeyimi qoruyum”.
KƏNAN BAHADIR
Digər xəbərlər
