Misli premyer-liqasında 35-ci tur da arxada qaldı.

Ötən turdan fərqli bu dəfə sürpriz nəticələr qeydə alınmadı. Avrokuboklar uğrunda rəqabət aparan komandalardan “Sumqayıt” büdrədi, “Sabah” gözlənilməz “Qəbələ” məğlubiyyətini “kimyaçılar” üzərindəki qələbəylə kompensasiya etdi. Turnir cədvəlinin indiki durumuna görə ən yaxşı vəziyyət “Neftçi”dədi. Lakin “ağ-qaralar”ın taleyini “Sabah”la ev oyunu həll edəcək. “Sumqayıt” isə sona 1 tur qalmış büdrəsə də, ən yaxın rəqiblərinin bir-biriylə mübarizə aparmasından yararlanmaq ehtimalı yüksəkdi. “Zirə” isə demək olar ki, bu komandalar arasında ən şanslısıdı. Artıq hər şey sonunucu - 36-cı tura qaldı.

“Qarabağ” – “Turan Tovuz” matçının ilk yarısında 1, ikincidə 6 top vuruldu. Həm Tovuz təmsilçisinin geridönüşü, həm də “köhlən atlar”ın əzmkarlığı əsl futbol aurası yaşatdı. Ağdamlılar üçün xalın heç bir önəmi qalmasa da belə, onlar son saniyələrə qədər döyüşdü. Eyni sözləri “bozqurd”a da aid etmək olar. Qonaqların çempiondan xal ala bilməməsini, sadəcə oyunçuların, fərdi keyfiyyəti və təcrübə ilə əlaqələndirmək olar.
Turun mərkəzi görüşü Masazırda keçirildi. Avrokuboklara iddialılıların mübarizəsi böyük maraq doğururdu. Xüsusən də “Sumqayıt”ın 7 oyunluq məğlubiyyətsizlik seriyasını və sonuncu məğlubiyyətini də “Sabah”dan aldığını nəzərə alsaq... Bu dəfə də “kimyaçılar”ın seriyasına “bayquşlar” son qoydu. Sumqayıt təmsilçisi hələ də avrokuboklara vəsiqə uğrunda mübarizədə üstündü. Axı komanda son oyunu evdə, artıq heç bir turnir vəzifəsi qalmayan “Qəbələ” ilə keçirəcək.

“Neftçi” isə cari mövsümdə 4 dəfə üzləşdiyi “Səbail”ə yalnız 2-ci turda xal verib. Doğrudu, tərəflər arasındakı son iki qarşılaşmanın hər birində Şahin Diniyevin yetirmələrinin yaxşı qol imkanları oldu. Lakin heç birini dəyərləndirə bilmədilər. Sanki bu komanda üçün “Neftçi” tilsimi var. Artıq avrokuboklara vəsiqəni təmin etmək Miodraq Bojoviçin son şansıdı. Monteneqrolu mütəxəssis ölkə kubokunda mübarizəni dayandırsa da, Avropaya vəsiqəni təmin etməlidi. Bunun üçün isə 36-cı turda “Sabah”a qalib gəlmək vacibdi.

“Zirə” avrokuboklara yollana biləcək komandalar arasında ən şanslısıdı. Bu fikri bir neçə tur öncədən də bəzi mütəxəssislər təsdiqləmişdi. Qəsəbə təmsilçisini sonuncu turda “Səbail”lə ev matçı gözləyir. Cari mövsümdə bu rəqiblərin mübarizəsində “qartallar” bir dəfə qalib gəlsə, qalan iki görüş heç-heçə bitib. Bu üzdən də qarşılaşma Rəşad Sadıqovun komandası üçün asan keçməyəcək. “Zirə”nin ölkə kuboku hesabına da Avropaya çıxmaq şansı var. Ancaq kubokun finalındakı rəqib əzazil “Qarabağ”dı... “Səbail” üçün isə artıq mövsüm bitib. Bunu Şahin Diniyev də təsdiqləyib. Görünən odu ki, Bayıl təmsilçisi meydana motivasiyasız çıxacaq.

Autsayderlərin mübarizəsindən “Qəbələ”nin qalib ayrılması “Araz-Naxçıvan”ın mövzud durumunu bütün çılpaqlığıyla göstərdi. İndiki durumda Kaxaber Sxadadzenin “Qəbələ” üçün ən ideal seçim olduğu görünməkdədi. Hətta bu seçimi bir qədər tez reallaşdırsaydılar, bəlkə də “qırmızı-qaralar”ın elitadan gedişini izləməzdik.

Misli premyer-liqası
4-cü dövrə, 35-ci tur
17 may
Qarabağ – Turan Tovuz 4:3
18 may
Sabah – Sumqayıt 2:0
Səbail – Neftçi 0:3
Kəpəz – Zirə 0:1
19 may
Qəbələ – Araz-Naxçıvan 2:0
1. Qarabağ 35 26 4 5 95-35 82
2. Neftçi 35 16 8 11 51-39 56
3. Zirə 35 15 10 10 32-22 55
4. Sabah 35 16 7 12 49-40 55
5. Sumqayıt 35 14 12 9 36-38 54
6. Turan Tovuz 35 12 9 14 52-53 45
7. Səbail 35 11 9 15 50-59 42
8. Kəpəz 35 9 8 18 39-66 35
9. Araz-Naxçıvan 35 9 8 18 29-48 35
10. Qəbələ 35 7 5 23 30-63 26

Bombardirlər: Olavio Juninyo (Qarabağ) – 19, Aleksandr Ramalinqom (Səbail) - 15, Yassin Benzia (Qarabağ), Nəriman Axundzadə (Qarabağ) – 12.

Növbəti turun proqramı
25 may, 19.00. Zirə - Səbail
25 may, 19.00. Neftçi – Sabah
25 may, 19.00. Sumqayıt – Qəbələ
26 may, 17.00. Turan Tovuz – Kəpəz
26 may, 19.30. Araz-Naxçıvan – Qarabağ

KAMAL SƏFƏR