“Əslində biz kimə qarşı oynadığımızı gərək çox yaxşı bilək - "Ayaks"a qarşı oynayırdıq. Düşünmürəm ki, günahkar axtarmaq lazımdı. Oyunun qırılma anı qırmızı vərəqə idi. Hakimlə bağlı, ümumiyyətlə, danışmaq istəmirəm. Çünki azarkeşləri başa düşürəm, məğlubiyyətə səbəb axtarırlar. Amma məncə, qırmızı vərəqə yüzdəyüz doğru idi. Həm birinci, həm də ikinci "qırmızı" düzgün idi. Andradenin qolunda gərək kor olasan ki, ofsaydı görməyəsən. Hətta otun biçilmə xəttinə baxsaq, Cəfərquliyev açıq-aşkar bir metr öndə idi. Hesab edirəm ki, hakimlə bağlı mübahisəli məsələ olmadı. Qapımıza penaltı təyin olunduğu epizod və Rençin Juninyonu əllə itələdiyi yerdə penaltı verilməliydi iddiaları ola bilər. Amma məğlubiyyətimiz bunun üzərində qurulmayıb axı. Yəni Juninyonun penaltisini vermədi deyə uduzmadıq - bunu qəbul edək. Digər tərəfdən, Medinanın penaltisində rəqib hücumçu çox ağıllı tərpəndi, gövdəsi ilə ayağını topun qarşısına qoydu. Sonuc etibarilə penaltisi qazandı. Hə, penalti verməmək olardı, amma yox idi demək gülüncdü. Juninyonun epizodunda ikisi də əllə bir-birinə toxunur. Nə ayağa təmas var, nə də başqa şey. Orda da penalti verilməməsi böyük günah deyildi. Adətən, Romao kimi futbolçuları son oyunçu kimi qoymurlar. Onun sürəti yoxdu. Hesab edirəm ki, "Ayaks"a da qalib gəlməli deyildik. İkinci hissədə 2-3 oyunçu meydana çıxan kimi oyun hərtərəfli dəyişdi. 11 nəfərlə oynasaydıq belə, ikinci hissədəki "Ayaks"a qarşı işimiz çox çətin olacaqdı. Qurban müəllimə yönələn “istefa” şüarları gülüncdü. Bu qədər uğur qazanmış məşqçini "Ayaks"la oyunda istefaya səsləmək həddən artıq ağır cəzadı. Təbii ki, səhvlər var idi. Amma bu səhvlərə görə məşqçi dəyişmək az gülməli səslənir. Hə, "Malmö", "Elfsborq”, “Bude/Qlimt” kimi komandalara qalib gəlməliyik. Amma “Ayaks”a və ya "Tottenhem"ə yox. Biz hələ ki o səviyyəyə çatmamışıq”.